არჩილ მოწონელიძე

დაბადების ადგილი: ქ. ქუთაისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი სამდინარო ნაგებობებისა და ჰიდროენერგოსადგურების მშენებლობის სპეციალობით 1969 წელს. 1971 წელს დაამთავრა ასპირანტურა მასალათა გამძლეობისა და დრეკადობის თეორიის კათედრაზე.

1972-1977წწ. საქართველოს პოლიტექნიკური ინსტიტუტის ჰიდროტექნიკური ნაგებობების კათედრის ასისტენტი იყო; 1977-1979წწ. ამავე კათედრის უფროსი მასწავლებელი; 1979 წელს არჩეული იყო საქართველოს პოლიტექნიკური ინსტიტუტის ჰიდრიტექნიკური ნაგებობების კათედრის დოცენტად; 1980-2006წწ. იყო კათედრის პროფესორი; 1980-1986წწ. საქართველოს ენერგეტიკისა და ჰიდროტექნიკური ნაგებობების სამეცნიერო-საკვლევი ინსტიტუტის ნაგებობათა სეისმომედეგობის განყოფილების უფროსი მეცნიერი-თანამშრომელი; 1989-1994წწ. საქართველოს ტექნიკური უნივერსიტეტის პრორექტორი (ჰუმანიტარული მუშაობის, საღამოსა და დაუსწრებელი სწავლებისა და სამეცნიერო მუშაობის დარგში); 1991-1996წწ. იყო საქართველოს ტექნიკური უნივერსიტეტის ინდუსტრიული და ბუნებრივი კატასტროფების სამეცნიერო-საკვლევი ლაბორატორიის ხელმძღვანელი; 1995-1998წწ. იყო საქართველოს ტექნიკური უნივერსიტეტის ზოგადი მენეჯმენტისა და საზოგადოებრივი ადმინისტრირების სკოლის მასწავლებელი (ხელმძღვანელობდა ტრენინგებს ზოგად მენეჯმენტში); 2003 წლიდან იყო კავკასიის ბიზნეს მაგისტრატურაში სტრატეგიული მენეჯმენტის კურსის ხელმძღვანელი; 2005-2006წწ. იყო საქართველოს ეროვნული სამეცნიერო ფონდის დირექტორი; 2006-2007წწ. საქართველოს ტექნიკური უნივერსიტეტის რექტორის მოვალეობის შემსრულებელი; 2007 წლიდან საქართველოს ტექნიკური უნივერსიტეტის რექტორად იქნა არჩეული; სხვადასხვა პერიოდში მონაწილეობდა ქვეყნისთვის მნიშვნელოვან სხვადასხვა პროექტში; მიწვეული იყო მსოფლიოს მრავალ უნივერსიტეტში, მათ შორის დიდ ბრიტანეთში (South Bank-ის უნივერსიტეტი, მშენებლობის გარემოს დეპარტამენტი; ბრიტანეთის კოლუმბიის უნივერსიტეტი (კანადა), მშენებლობის დეპარტამენტი; Transform Consultants, ბელფასტი), გერმანიაში, აშშ-ში, ბელგიასა და ფინეთში, როგორც ექსპერტი, პროფესორი, პარტნიორი და სხვა; 1991 წლიდან ეწევა საზოგადოებრივ საქმიანობას; იყო საქართველოს სწავლულ ექსპერტთა საბჭოს წევრი; საქართველოს სანოსტრიფიკაციო კომისიის წევრი; ჰიდრომშენებლობის დარგში სამეცნიერო ხარისხების მიმნიჭებელი საბჭოს თავმჯდომარის მოადგილე; საერთაშორისო სამეცნიერო-ტექნიკური ცენტრის (სსტც - ISTA) საკოორდინაციო კომიტეტის წევრი; არის საერთაშორისო ტექნიკური ასოციაციების კავშირის (UITA-UATI) ექსპერტი (პარიზი), ენერგეტიკის ნაციონალური აკადემიის წევრი და აშშ-ს სამეცნიერო საზოგადოება Sigma Xi-ს წევრი; საქართველოს წარმომადგენელი NATO-ს კომიტეტში "მეცნიერება მშვიდობისა და უსაფრთხოებისთვის"; მშენებლობის დარგში სამეცნიერო ხარისხების მიმნიჭებელი საბჭოს წევრი; გამოქვეყნებული აქვს 128 სამეცნიერო ნაშრომი და 1 სახელმძღვანელო - "მშენებლობის მენეჯმენტი"; ტექნიკის მეცნიერებათა კანდიდატი (1973); ტექნიკის მეცნიერებათა დოქტორი (1986). 

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.430-431; საქართველოს ტექნიკური უნივერსიტეტი: gtu.ge; construction.gtu.ge

• 2005 - საქართველოს პრეზიდენტის მადლობის სიგელი

• მშენებლობის მენეჯმენტი : სახელმძღვ. (ავტორი). - თბილისი, 1996. - 249გვ.
• სამდინარო ნაგებობათა და ჰიდროელექტროსადგურების ჰიდროტექნიკური მშენებლობის სპეციალობის (1203) სტუდენტთა მეორე ტექნოლოგიური საწარმოო პრაქტიკის პროგრამა და მეთოდური მითითებები (შემდგენელი). - თბილისი, საქ. პოლიტექნ. ინ-ტის გამ-ბა და სტ., 1979. - 14გვ.