რევაზ მხეიძე

დაბადების ადგილი: ქ. ფოთი.

დაამთავრა საქართველოს პოლიტექნიკური ინსტიტუტის ელექტროტექნიკის ფაკულტეტი 1954 წელს.

შრომითი საქმიანობა დაიწყო სომხეთში, ყაჯარანის მოლიბდენის კომბინატში ელექტრო ლაბორატორიის უფროსად; საქართველოში დაბრუნების შემდეგ მუშაობდა სხვადასხვა საწარმოებში, მათ შორის: თბილისის ქარხანა "ელექტროავტომატში" მთავარ ენერგეტიკოსად, საწარმოო გაერთიანება "ელექტროაპატარში" საპროექტო ბიუროს მთავარ ინჟინრად, ელექტრო მანქანათმშენებლობის ტექნოლოგიების საკავშირო კვლევით ინსტიტუტში განყოფილების უფროსად; იყო საქართველოს პოლიტექნიკური ინსტიტუტის ელექტროტექნიკური მანქანების კათედრის პედაგოგი; წლების განმავლობაში იმყოფებოდა მივლინებით ალჟირის რესპუბლიკაში სამშენებლო კონსტრუქციების ქარხნის მშენებლობაზე; 1981 წელს სათავეში ჩაუდგა საქართველოს მინისტრთა საბჭოსთან არსებულ სამონტაჟო და სპეციალური სამუშაოების მთავარ სამშენებლო-სამონტაჟო გაერთიანება "საქმთავარმონტაჟსპეცმშენის" ტრესტ "საქელექტრომონტაჟს"; მისი ხელმძღვანელობით სამონტაჟო სამუშაოები შესრულდა სახელმწიფო მნიშვნელობის მრავალ ობიექტზე თბილისში, ფოთში, ქობულეთში, მიუსერაში და სხვა; აქტიურად მონაწილეობდა თბილისის სახელმწიფო უნივერსიტეტის მაღლივი კორპუსის, სამედიცინო ინსტიტუტის, ფოთის სპორტული კომპლექსის, საცხოვრებელი სახლების, საბავშვო ბაღებისა და სხვა სოციალურ-კულტურული დანიშნულების ობიექტების მშენებლობაში; იყო სხვადასხვა სახელმწიფო ჯილდოს მფლობელი.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.444-445

• საქართველოს დამსახურებული ინჟინერი