კარლო სოზიაშვილი

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი არქიტექტურის სპეციალობით 1950 წელს.

1950 წელს მუშაობა დაიწყო თბილისის საპროექტო ინსტიტუტ "საქკომუნპროექტში"; 1954 წლიდან საცხოვრებლად გადადის ქ. მოსკოვში, სადაც მუშაობდა ქალაქდაგეგმარების საპროექტო ინსტიტუტ "მოსპროექტში"; მონაწილეობდა ქალაქების ომსკისა და უფის გენერალური გეგმების შედგენაში; 1963 წლიდან მივლინებული იყო ქ. მაგადანში, ჩრდილო-აღმოსავლეთ რეგიონის სახალხო მეურნეობის საბჭოს მშენებლობისა და სამშენებლო მასალების მრეწველობის სამმართველოში მთავარ ინჟინრად; 1966 წელს დაინიშნა მაგადანის ოლქის სამშენებლო ტრესტ "მაგადანრემმშენის" მმართველად; 1968 წელს კი საპროექტო ინსტიტუტ "მაგადანკომუნპროექტის" დირექტორად; არჩეული იყო ქ. მაგადანის საქალაქო საბჭოს დეპუტატად; 1973 წელს ბრუნდება საქართველოში და მუშაობას იწყებს საქართველოს მშენებლობის სამინისტროს N12 სამშენებლო ტრესტის მმართველად; მისი ხელმძღვანელობით აშენდა ბორჯომის კომპოზიტორთა სახლი და მთელი რიგი მნიშვნელოვანი სოციალურ-კულტურული დანიშნულების ობიექტები; 1977 წლიდან მუშაობდა საქართველოს მშენებლობის სამინისტროს ტრესტ "ორგტექმშენის" მთავარი ინჟინრის თანამდებობაზე.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.514-515

• საპატიო ნიშნის ორდენი
• ღირსების ორდენი