ბიძინა სონღულაშვილი

დაბადების ადგილი: სოფელი ძირკოკი, გურჯაანის რაიონი.

დაამთავრა საქართველოს პოლიტექნიკური ინსტიტუტი სამთო საინჟინრო ფაკულტეტი სამთო საწარმოთა მშენებლობის სპეციალუბით 1977 წელს.

1977-1979წწ. მუშაობა დაიწყო საქართველოს პოლიტექნიკური ინსტიტუტის სამთო ფაკულტეტზე კათედრის ასისტენტად; შემდეგ წლებში მუშაობდა კომკავშირულ და პარტიულ ორგანოებში; 1979-1990წწ. იყო სამშენებლო ტრესტ "თბილმეტრომშენის" კომკავშირის ბიუროსა და პარტიული კომიტეტის მდივანი, საქართველოს კომპარტიის ქ. თბილისის ოქტომბრის რაიონული კომიტეტის მდივანი; 1990-1995წწ. იყო სამშენებლო გაერთიანება "თბილმეტრომშენის" გენერალური დირექტორის მოადგილე სამოქალაქო მშენებლობისა და საკადრო-სოციალურ საკითხებში; 1996-1997წწ. გურჯაანის რაიონის გამგეობის თავმჯდომარე; 1997-2000წწ. სახელმწიფო საწარმო "თბილმეტრომშენის" გენერალური დირექტორი; 2000-2003წწ. იყო პრეზიდენტის რწმუნებული კახეთის რეგიონში; 2004-2005წწ. შპს "საინჟინრო-სამშენებლო ჯგუფის" უფროსი; 2008-2009წწ. სამშენებლო კომპანია შპს "აზიმუტის" ვიცე-პრეზიდენტი; 2010-2011წწ. შპს "სონნეტ კონსტრაქშენის" პრეზიდენტი; 2008 წლიდან არის შპს "ედრესის" მრჩეველი; 2012 წლიდან შპს "უნიკუმის" დირექტორი; უშუალოდ ხელმძღვანელობდა ვაჟა-ფშაველას გამზირზე მეტროპოლიტენის ხაზის ღია მეთოდით მშენებლობას, ასევე, თბილისის მეტროპოლიტენის მშენებარე საბურთალოს ხაზის მონაკვეთის (1,1 კმ სიგრძით) და სადგურ "ვაჟა-ფშაველას" ექსპლუატაციაში გაშვებას (2003); გაერთიანება "თბილმეტრომშენის" ფილიალის მეშვეობით, განახორციელა მოსკოვის მეტროსადგურ "ოხოტნი რიადისა" და უნიკალური მიწისქვეშა სავაჭრო ცენტრ "მანეჟის მოედნის" მიწისქვეშა სივრცესთან მიერთება, ასევე, ეკატერინბურგის მეტროპოლიტენის სადგურების მშენებლობა; აქტიურად იყო ჩართული რამდენიმე მნიშვნელოვანი საგანმანათლებლო, კულტურული, სამედიცინო და სასოფლო-სამეურნეო პროექტების განხორციელებაში; მონაწილეობდა მეტროსადგურების "ვაგზლის მოედნის", "წერეთლის", "პოლიტექნიკური ინსტიტუტის", "დელისის", "სამედიცინო ინსტიტუტის", "ღრმაღელეს", "გურამიშვილის", "ახმეტელის თეატრის","ვარკეთილის" საექსპლუატაციოდ გადაცემაში.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.515-516; წიგნი ღირსებისა: ტ. 5 / შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2003. - გვ.89

• 2024 - თბილისის საპატიო მოქალაქე
• 2000 - ღირსების ორდენი
• საქართველოს დამსახურებული მშენებელი
• ვახტანგ გორგასლის I ხარისხის ორდენი