შოთა ტყეშელაშვილი

დაბადების ადგილი: ქ. ქუთაისი.

დაამთავრა საქართველოს ინდუსტრიული ინსტიტუტის სამშენებლო ფაკულტეტი სამრეწველო და სამოქალაქო მშენებლობის სპეციალობით 1939 წელს.

შრომითი საქმიანობა დაიწყო საქართველოს მშენებლობის სამინისტროს ქუთაისის სამშენებლო ტრესტში სამუშაოთა მწარმოებლად; მეორე მსოფლიო ომის დროს მონაწილეობდა კავკასიის ფრონტის თავდაცვითი და საფორტიფიკაციო ობიექტების დაპროექტება-მშენებლობაში; ომის შემდეგ ხელმძღვანელობდა სამხედრო ობიექტების, მათ შორის, სამხედრო აეროპორტების (გუდაუთაში, სენაკსა და ქუთაისში) მშენებლობას; თადარიგში გასვლის შემდეგ მუშაობდა საქართველოს მშენებლობის საქმეთა სახელმწიფო კომიტეტში, ასევე, საქართველოს სახელმწიფო საგეგმო კომიტეტში კაპმშენებლობის განყოფილების გამგის მოადგილედ (1959 წლიდან) და საპროექტო-საძიებო განყოფილების გამგედ (1971 წლიდან); წლების განმავლობაში ეწეოდა პედაგოგიურ საქმიანობას საქართველოს პოლიტექნიკურ ტექნიკუმში; იყო სამშენებლო ფაკულტეტის სახელმწიფო საგამოცდო კომისიის წევრი; ჰქონდა სამხედრო, სამოქალაქო და საუწყებო ჯილდოები.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.536

• შრომის ვეტერანი
• საქართველოს დამსახურებული ინჟინერი