რამინ ქეცბაია

დაბადების ადგილი: ქ. გალი.

დაამთავრა საქართველოს პოლიტექნიკური ინსტიტუტის სამთო ფაკულტეტი, სამთო ინჟინრის კვალიფიკაციით 1953 წელს.

1953-1962წწ. მუშაობდა სამთო მომპოვებელ ტრესტ "ტყვარჩელქვანახშირის" N2 შახტის N3 მიწისქვეშა უბნის უფროსად, N2 შახტის მთავარი ინჟინრის თანაშემწედ, მოადგილედ; 1962-1969წწ. N5 შახტის მთავარ ინჟინრად; 1969-1977წწ. იყო საქართველოს კომპარტიის ცკ მრეწველობა-ტრანსპორტის და ორგანიზაციულ-პარტიული მუშაობის განყოფილების ინსტრუქტორი და ინსპექტორი; 1977-1985წწ. მუშაობდა საქართველოს კპ აფხაზეთის საოლქო კომიტეტის სოხუმის საქალაქო კომიტეტის პირველ მდივნად; 1985-1992წწ. გადმოიყვანეს საქართველოს სსრ მინისტრთა საბჭოს მრეწველობის, ენერგეტიკის, საბინაო-კომუნალური და საგზაო მეურნეობების განყოფილების გამგედ; 1992-1994წწ. მუშაობდა მოსკოვის ერთობლივ საწარმო "მეტალკომერცი ბ"-ს კომერციული განყოფილების უფროსის მოადგილედ; 1995-1997წწ. შპს "ტრანსსერვისის" ვიცე-პრეზიდენტი; 1997 წლიდან არის "სოციალური დაცვისა და დემოგრაფიის საერთაშორისო საქველმოქმედო ფონდის" დამკვირვებელთა საბჭოს თავმჯდომარე; დიდი დახმარება მიუძღვის ქ. სოხუმის კომპლექსური განაშენიანებისა და სოციალურ-ეკონომიკური განვითარების საქმეში, ბინათმშენებლობისა და კომუნალური მეურნეობის ბაზის რეკონსტრუქცია-გაფართოებაში; 1960-1980 წწ. სამთო მომპოვებელი საწარმოო გაერთიანების "საქნახშირის" სამრეწველო ობიექტების მშენებლობისა და ბაზის განვითარების საქმეში, საქართველოს ენერგოსისტემის პერსპექტიული განვითარებისა და ტექნიკური გადაიარაღების პროგრამის დამუშავება-განხორციელებაში; დაჯილდოებულია საქართველოს სსრ და აფხაზეთის ასსრ უმაღლესი საბჭოების პრეზიდიუმის რამდენიმე საპატიო სიგელით და სხვა ჯილდოებით.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.565-566

• საქართველოს ეროვნულ და სოციალურ ურთიერთობათა აკადემია, ნამდვილი წევრი

• 1976 - საპატიო ნიშნის ორდენი
• 1975 - საქართველოს დამსახურებული ინჟინერი
• ივანე ჯავახიშვილის სახელობის მედალი
• შრომის ვეტერანი
• მეშახტის დიდების მედალი