არჩილ ყუბანეიშვილი

დაამთავრა საქართველოს პოლიტექნიკური ინსტიტუტის სამშენებლო ფაკულტეტი ინჟინერ-მშენებლის კვალიფიკაციით 1960 წელს; 1964-1966წწ. სწავლობდა ასპირანტურაში.

1960-1963წწ. მუშაობდა საბჭოთა კავშირის სატრანსპორტო მშენებლობის სამინისტროს N454 სამშენებლო-სამონტაჟო სამმართველო "ხიდმშენში" ხიდების მშენებლობასა და რეკონსტრუქციაზე სამუშაოთა მწარმოებლად; 1967 წლიდან - საქართველოს ენერგეტიკისა და ჰიდროტექნიკურ ნაგებობათა სამეცნიერო-კვლევით ინსტიტუტში უმცროსი, უფროსი მეცნიერ-თანამშრომლის, განყოფილების გამგის თანამდებობებზე. მისი მოღვაწეობის სფერო მოიცავს ახალი პროგრესული კონსტრუქციების დამუშავებასა და ენერგეტიკულ, სამოქალაქო და სამრეწველო მშენებლობაში დანერგვას; მისი ხელმძღვანელობითა და მონაწილეობით დამუშავებულია რვა თავი "სამშენებლო ნორმები და წესები"; მეცნიერულ და პრაქტიკულ დონეზე ატარებდა საქართველოში მშენებარე, კონსტრუქციულად რთულ ნაგებობებში გამოყენებული სამშენებლო მასალების კვლევას; გამოქვეყნებული აქვს 100-ზე მეტი სამეცნიერო ნაშრომი, მიღებული აქვს 10 საავტორო მოწმობა, საქართველოს, გერმანიის, აშშ, იაპონიის პატენტები. 1990-2008წწ. იყო საქართველოს ენერგეტიკისა და ენერგეტიკულ ნაგებობათა სამეცნიერო-კვლევითი ინსტიტუტისა და საქართველოს ტექნიკური უნივერსიტეტის სამეცნიერო ხარისხების მიმნიჭებელი სპეციალიზირებული საბჭოების წევრი. 1988 წლიდან კითხულობს ლექციების კურსს საქართველოს ტექნიკურ უნივერსიტეტში, ხელმძღვანელობს მაგისტრანტებსა და დოქტორანტებს. 1987-1990წწ. არჩეული იყო სსრკ ენერგეტიკისა და ელექტრიფიკაციის სამინისტროს ჰიდროენერგეტიკული ნაგებობების დინამიკისა და სეისმოლოგიის საუწყებო კომისიის წევრად. ტექნიკურ მეცნიერებათა კანდიდატი (1968), ტექნიკურ მეცნიერებათა დოქტორი (1988), პროფესორი (1992).

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.597; საქართველოს ენერგეტიკოსები=Georgian Power Engineers: ენციკლოპედია.- თბილისი, 2016.- გვ.359-360

• საქართველოს ენერგეტიკის აკადემია, წევრი
• საქართველოს საინჟინრო აკადემია, წევრი

• ღირსების ორდენი

• მშენებლობის ორგანიზაციისა და სამუშაოთა წარმოების პროექტი : დამხმ. სახელმძღვ. (თანაავტორი). - თბილისი, ტექნ. უნივერსიტეტი, 2002. - 64გვ.. - ISBN: 9992890037