გიორგი ჩომახიძე

დაბადების ადგილი: ქ. თბილისი.

დაამთავრა ამიერკავკასიის სამიმოსვლო გზების ინსტიტუტი ხიდებისა და გვირაბების მშენებლობის სპეციალობით 1931 წელს.

1930-1933წწ. მუშაობდა მდინარე მტკვარზე ჩელუსკინელების (ამჟამად თამარ მეფის) სახელობის ხიდის მშენებლობაზე, თბილისის საქალაქო საბჭოს აღმასკომში საინჟინრო ნაგებობების საპროექტო სახელოსნოს ხელმძღვანელად; 1933-1941წწ. ბარათაშვილის აღმართის მშენებლობაზე, საპროექტო ინსტიტუტ "თბილქალაქპროექტის" მთავარი ინჟინრის მოადგილედ; თბილისის საჰაერო დაცვის შტაბის მთავარ ინჟინრად, საქართველოს შინაგან საქმეთა სამინისტროს შტაბის მთავარ ინჟინრად (ჯარში გაწვევის შემდეგ); 1944 წელს დაინიშნა საქართველოს მინისტრთა საბჭოს არქიტექტურის საქმეთა სამმართველოს უფროსის მოადგილედ; 1947 წელს - გორის ბამბეულის კომბინატის მშენებლობის დირექტორად; 1948 წელს - თბილისის დაგეგმარების მთავარ ინჟინრად; 1949-1950წწ. იყო თბილისის საქალაქო საბჭოს აღმასკომის კომუნალური განყოფილების მთავარი ინჟინერი; 1950-1953წწ. სამშენებლო ტრესტ "თბილმშენის" მთავარი ინჟინერი და მმართველის მოადგილე; 1953-1968წწ. მუშაობდა საქართველოს მშენებლობის სამინისტროს ტექნიკური სამმართველოს უფროსად, იყო სამინისტროს კოლეგიის წევრი; 60-იანი წლების დასაწყისში ზედამხედველობდა ბიჭვინთის საკურორტო კომპლექსის მშენებლობის პროექტის ტექნიკურ ნაწილს, რომელიც შეიცავდა იმ პერიოდის სამშენებლო წარმოებისა და პროექტირების მიმართულებით მნიშვნელოვან ტექნიკურ სიახლეებს; იყო მრავალი სამშენებლო დაწესებულების კონსულტანტი; მონაწილეობდა ჩელუსკინელების სახელობის ხიდის დაპროექტება-მშენებლობაში, ბარათაშვილის სახელობის აღმართის რეკონსტრუქციის პროექტის შემუშავებაში (თბილისში); მისი პროექტით აშენდა მდინარე რიონზე რიონზე ოთხმალიანი ხიდი (ქ. ქუთაისში), მილსადენების გადასაყვანი ხიდები, მეტეხისა და ვერის ხიდები მდინარე მტკვარზე (თბილისში), I კატეგორიის თავშესაფარი (თბილისის ბოტანიკური ბარის გვირაბში), რიგი თავდაცვითი ობიექტები? კავთისხევის სარწყავი სისტემის 600 მმ-იანი ზიგზაგური მილსადენი, ქსნის მინის ქარხნის სოდის შესანახი სილოსები; თანაავტორებთან ერთად, საქართველოში პირველად განახორციელა დაკიდული კონსტრუქცია სოხუმის სუბტროპიკულ ინსტიტუტში; იყო სსრკ მეცნიერებათა აკადემიის სეისმოლოგიისა და სეისმომედეგი მშენებლობის საბჭოსა და საქართველოს მეცნიერებათა აკადემიის სამშენებლო მექანიკისა და სეისმომედეგობის ინსტიტუტის სამეცნიერო საბჭოს წევრი. მიღებული აქვს საქართველოს უმაღლესი საბჭოს პრეზიდიუმის საპატიო სიგელი.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.646-647; წიგნი ღირსებისა: ტ. 1/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2000. - გვ.334

• საქართველოს არქიტექტორთა კავშირი, წევრი
• საქართველოს საინჟინრო აკადემია, საპატიო წევრი

• 1996 - ღირსების ორდენი
• საქართველოს დამსახურებული ინჟინერი