იუზა ჩუბინიძე

დაბადების ადგილი: სოფელი ხალიფაური, ჭიათურის რაიონი.

დაამთავრა საქართველოს პოლიტექნიკური ინსტიტუტი ინჟინერ-მექანიკოსის კვალიფიკაციით 1973 წელს.

1973-1986წწ. მუშაობდა სამონტაჟო და სპეციალური სამუშაოების მთავარი სამმართველოს "საქმთავარმონტაჟსპეცმშენის" ტრესტ "საქმექანომონტაჟის" რუსთავის სამონტაჟო სამმართველოში, სადაც გაიარა გზა რიგითი ოსტატიდან სამმართველოს უფროსამდე; 1986 წელს სამმართველოს ბაზაზე ჩამოაყალიბა სამონტაჟო ნაკეთობათა საწარმო, რომელიც 1994 წელს გატარდა რეგისტრაციაში, როგორც სააქციო საზოგადოება "სარინი", სადაც დღემდე მუშაობს დირექტორად; 1973 წლის შემდეგ მონაწილეობდა შემდეგ ექსპლუატაციაში მიღებული ობიექტების მშენებლობაში - რუსთავის საწარმოო გაერთიანება "აზოტსა" და მეტალურგიულ კომბინატში, რუსთავისა და თბილისის ქარხნებში "ცენტროლიტი", თბილისის ელმავალმშენებელ ქარხანაში, მადნეულის სამთო-გამამდიდრებელ კომბინატში და სხვა; მონაწილეობდა "ბაქო-სუფსის" ნავთობსადენის მშენებლობაში და მის ექსპლუატაციაში; დიდი წვლილი შეიტანა "ბაქო-თბილისი-ჯეიჰანის" გაზსადენის სამშენებლო-სამონტაჟო სამუშაოების შესრულებაში; 2002 წელს მისი ხელმძღვანელობით ს/ს "სარინმა" დაამზადა და ექსპლუატაციაში გაუშვა თბილისის ღუდუშაურის სახელობის ტრავმატოლოგიური ცენტრის საქვაბე და ნარჩენების დასაწვავი დანადგარები; 2001 წელს დაამონტაჟეს და ექსპლუატაციაში გაუშვეს ყვარლის ჰიდროელექტროსადგური; მონაწილეობდა ქალაქ თბილისში საქართველოს საპატრიარქოს წმიდა სამების საკათედრო ტაძრის მშენებლობაში; მისი ხელმძღვანელობით ს/ს "სარინში" დამზადდა და დამონტაჟდა ტაძარზე აღმართული 2,7- ტონიანი ჯვარი; 2007-2009წწ. განახორციელა ე.წ. "ნახშირის პროექტი" კასპისა და რუსთავის ცემენტის ქარხნებში, რომელიც უზრუნველყოფს ტყიბულის იაფი ქვანახშირის გამოყენებას ცემენტის წარმოებაში საწვავად; დაამზადეს და დაამონტაჟეს რუსთავისა და კასპის ცემენტის ქარხნებში საფილტრი დანადგარები; 2010-2011წწ. ქალაქ ტყიბულში განახორციელა 13,2-მეგავატიანი სიმძლავრის თბოელექტროცენტრალის მშენებლობა; 2012 წელს ყულევის ტერმინალის ტერიტორიაზე განახორციელა თხევადი აირის მიღება - გადატვირთვის ტერმინალის მშენებლობა; 2012-2013წწ. მონაწილეობა მიიღო რაჭაჰესის 14 მეგავატიანი ჰიდროელექტროსადგურის საექსპლუატაციოდ გაშვებაში; ახორციელებს "ჰაიდელბერგცემენტის" რუსთავისა და კასპის ქარხნების ტექნიკურ გადაიარაღებას.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.650-651; წიგნი ღირსებისა: ტ. 3/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.259

• 2001 - რუსთავის საპატიო მოქალაქე
• 1998 - ღირსების მედალი
  ქ. რუსთავის აღმშენებლობაში, მოსახლეობის სოციალ-ეკონომიკური პირობების გაუმჯობესებაში შეტანილი პირადი წვლილისა და ნაყოფიერი მოღვაწეობისათვის
• ღირსების ორდენი