პავლე ძინძიბაძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი არქიტექტურის სპეციალობით 1960 წელს.

მუშაობდა საქართველოს პოლიტექნიკურ ინსტიტუტში არქიტექტურის ფაკულტეტის საპროექტო ბიუროში არქიტექტორად; 1978 წლიდან დაიწყო პედაგოგიური საქმიანობა პოლიტექნიკური ინსტიტუტის არქიტექტურის ფაკულტეტის არქიტექტურული დაგეგმარების კათედრაზე; არქიტექტურის ფაკულტეტზე ურბანული დაგეგმარების (ურბანისტიკის) კათედრის დაარსების დღიდან (1992) მოღვაწეობა განაგრძო ამავე კათედრაზე უფროსი მასწავლებლის, დოცენტის, ასოცირებული პროფესორის თანამდებობებზე; 2005-2006წწ. იყო იმავე კათედრის გამგე; 1996-2000წწ. პედაგოგიური მოღვაწეობის პარალელურად მუშაობდა თბილისის მთავარი არქიტექტორის პირველ მოადგილედ; 2003-2004წწ. იყო საქართველოს ურბანიზაციისა და მშენებლობის სამინისტროს ქალაქთმშენებლობის დეპარტამენტის თავმჯდომარე; არის 15-ზე მეტი რეალიზებული პროექტის ავტორი. მათ შორისაა საკონკურსო პროექტები: ბავშვთა გასართობი მოედნების (თბილისში 1971), მარჯანიშვილის თეატრის შენობის (1976), რიყის უბნის (1982), "ორთაჭალის ბაღების" (1986), ასევე თბილისში გგლდანის მე-6 მიკრორაიონის (1988), თბილისში თავისუფლების მოედანზე სასტუმრო "ქორთიარდ მარიოტის" (1998), თბილისის ურბანული განვითარების კონცეფციის (2002), თბილისში სამუზეუმო უბნის (2005); 1988-1994წწ. იყო ახალგაზრდა არქიტექტირთა საერთაშორისო ფორუმის საქართველოს ეროვნული კლუბის პრეზიდენტი; მისი უშუალო ხელმძღვანელობით ჩატარდა: ბათუმის საერთაშორისო საპროექტო სემინარი საქართველოს, ლიტვის, ლატვიის, რუსეთის, ბულგარეთის, კვიპროსის, საბერძნეთის, გერმანიის ფედერაციული რესპუბლიკის ახალგაზრდა არქიტექტორთა მონაწილეობით (1989), თბილისში რიყის უბნის საერთაშორისო კონკურსი-სემინარი (1991).

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.680