გურამ ჭაია

დაბადების ადგილი: ქ. ხონი.

დაამთავრა საქართველოს პოლიტექნიკური ინსტიტუტის სატრანსპორტო ფაკულოტეტი ავტოგზების მშენებლობის სპეციალობით 1964 წელს; საკვალიფიკაციო კურსები ჰიდროგეოლოგიაში (ქ. ლენინგრადში) 1968 წელს.

1965-1970წწ. მუშაობდა "ენგურჰესის" მშენებლობაზე; წლების განმავლობაში მუშაობდა საპროექტო ინსტიტუტებში - "საქჰიდროპროექტი" და "თბილსახავტოგზაპროექტი"; გაიარა ყველა სამსახურებრივი საფეხური ინჟინრიდან პროექტის მთავარ ინჟინრამდე; მივლინებული იყო სამუშაოდ საზღვარგარეთ, ბურიატ-მონროლეტის რესპუბლიკაში, სადაც მუშაობდა "კუნძუ-ტალერისა" (1970); 1970-1971წწ. "ულან უდე-მუხორშიბირის" საავტომობილო გზების მშენებლობაზე უფროს ინჟინრად და უფროს გეოდეზისტად; 1972-1973წწ. "ჯიზაკი-26 კომისრის სახელობის საბჭოთა მეურნეობის" (უზბეკეთში) პარტიის უფროსად; 1974-1980წწ. "ტახტა-ბაზარი-კერკის" (თურქმენეთში) პარტიისა და ექსპედიციის უფროსად;1980-1982წწ. იყო სამშენებლო ტრესტ "კოლხეთმშენის" ხონის რაიონის სამშენებლო სამმართველოს მთავარი ინჟინერი; 1982-1984წწ. რაიონული საწარმოო-საგზაო უბნის უფროსი; 1985-1988წწ. მონაწილეობდა პროექტში "ჩრდილოეთის წყლების სამხრეთში გადაგდება", როგორც საავტომობილო გზების საკვლევ-საძიებო ექსპედიციის უფროსი; 1989-1995წწ. მუშაობდა ხონის რაიონის პრეფექტურა-გამგეობაში არქიტექტურისა და მშენებლობის განყოფილების გამგედ; 2005 წლამდე მუშაობდა სამშენებლო ფირმებში "IDC" და "ჯეოინჟინერინგი" საავტომობილო გზების რეკონსტრუქციისა და დაპროექტება-მშენებლობის ხარისხის ოფიცრად და სექტორის უფროსად; თავისი პროფესიული საქმიანობის განმავლობაში საქართველოსა და მის ფარგლებს გარეთ განახორციელა 900 კმ-ზე მეტი საავტომობილო გზის საკვლევ-საძიებო და საპროექტო სამუშაოები; მნიშვნელოვანი წვლილი აქვს შეტანილი აბაშისა და ჩოხატაურის რაიონების ჭარბტენიანი ნიადაგების დაშრობაში, აბაშისა და ხონის რაიონებისთვის თვითდინებადი მილსადენებით სასმელი წყლის მიწოდებაში, ხონის ცენტრალური სტადიონისა და "დინამოს" დიღმის სათადარიგო მოედნის რეკონსტრუქციაში; მიღებული აქვს სახელმწიფო ჯილდოები.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.691

• შრომის ვეტერანი