ცირა ბარბაქაძე

სხვადასხვა დროს იყო რიტორიკისა და ზოგადი ენეთმეცნიერების კათედრის გამგე, ფაკულტეტის დეკანი სულხან-საბა ორბელიანის სახელმწიფო უნივერსიტეტსა და ილიას სახელმწიფო უნივერსიტეტში, სენატის წევრი ილიას უნივერსიტეტში. 1996-1998 წწ. იყო ქართული საენათმეცნიერო გაზეთის – "სიტყუაი" მთავარი რედაქტორი და გამომცემელი, 1998-2002 წწ. კი "ქართველოლოგიური ბიბლიოთეკის" სერიის პასუხისმგებელი მდივანი. 2006 წლიდან არის სამეცნიერო ჟურნალ "სემიოტიკის" მთავარი რედაქტორი და გამომცემელი (გამოცემულია "სემიოტიკის" 14 ნომერი). 2010 წლიდან არის სემიოტიკის ყოველწლიური სამეცნიერო კონფერენციის ორგანიზატორი (2015 წელს ჩატარდა სემიოტიკის მე-6 სამეცნიერო კონფერენცია ბათუმში). სემიოტიკის კვლევით ცენტრში დააარსა სერია: "სემიოტიკური თარგმანები", რომელიც აერთიანებს შემდეგ გამოცემებს: როლან ბარტის "წერის ნულოვანი დონე", იური ლოტმანის "მოაზროვნე სამყაროს შიგნით", ხოსე ორტეგა იგასეტის "ადამიანი და ხალხი". 2014 წელს გამოსცა ფენტეზის ჟანრის პირველი პოეტური კრებული, რომელშიც ქართველი ავტორები შევიდნენ. არის რამდენიმე პოეტური კრებულის ავტორი: "ლექსები" (1996), "გამოაღეთ სარკმელი" (2003), "დუმილის ა(მ)ბები" (2008), "უცხოქალაქი" (2011). გატაცებულია მხატვრული ფოტოგრაფიით, 2003 წელს შედგა მისი პირველი პერსონალური ფოტოგამოფენა "ომეგა-გალერიაში", შემდეგ სხვა საგამოფენო დარბაზებში. ფილოლოგიის მეცნიერებათა დოქტორი, პროფესორი.

საკანდიდატო დისერტაციის თემა - "ქართველური ენები", დაიცვა 1997 წელს; სადოქტორო დისერტაციის თემა -  "ქართული მჭევრმეტყველების ლინგვოპრაგმატიკა", დაიცვა 2004 წელს.

წყარო: ილიას სახელმწიფო უნივერსიტეტის ვებგვერდი: faculty.iliauni.edu.ge; ქართველი პოეტები : ენციკლოპედია / შეადგინა ალექსანდრე ელერდაშვილმა.- თბ.,2021.- გვ.49

• პოეზიის სემიოტიკა = Semiotics of poetry (Author). - თბილისი, უნივერსალი, 2009. - 182გვ.
• ქართული მჭევრმეტყველების პრაგმატიკა (Author). - თბილისი, 2003. - 265გვ.
• გამოაღეთ სარკმელი (Author). - თბილისი, ლომისი, 2003. - 68გვ.
• ტკივილიდან...რწმენამდე : ლექსები (Author). - თბილისი, ლომისი, 1996. - 72გვ.