ნიკოლოზ ჭკუასელი

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი ჰიდროტექნიკური მშენებლობის სპეციალობით 1958 წელს.

1958-1962წწ. მუშაობდა საპროექტო ინსტიტუტ "თბილქალაქპროექტში" ინჟინერ-კონსტრუქტორად; 1962-1976წწ. საქართველოს მეცნიერებათა აკადემიის სამშენებლო მექანიკისა და სეისმომედეგობის ს/კ ინსტიტუტში უფროს ინჟინრად, უმცროს და უფროს მეცნიერ-თანამშრომლად; 1964-1969წწ. ამიერკავკასიის სამხედრო ოლქის საპროექტო ინსტიტუტ "ვოენპროექტში" ინჟინერ-კონსტრუქტორად; 1971-1974წწ. მივლინებული იყო ალჟირის სახალხო დემოკრატიულ რესპუბლიკაში, საკონსტრუქტორო ბიუროსა და საპროექტო-ტექნოლოგიურ ინსტიტუტში უფროს ინჟინერ-კონსტრუქტორად, მთავარ ინჟინრად; 1976-1996წწ. მუშაობდა საქართველოს მშენებლობის საქმეთა სახელმწიფო კომიტეტში, საქართველოს არქიტექტურისა და მშენებლობის სამინისტროს, ასევე ურბანიზაციისა და მშენებლობის სამინისტროს სამეცნიერო სამუშაოებისა და ახალი ტექნიკის განყოფილების, სამეცნიერო-ტექნიკური და მთავარი სამეცნიერო-ტექნიკური სამმართველოების უფროსად; იყო სამინისტროს კოლეგიის წევრი; 1977-1992წწ. თავმჯდომარეობდა სამშენებლო ფაკულტეტის სახელმწიფო საგამოცდო კომისიას; 1996 წლიდან იყო საპროექტო-სამშენებლო საქმიანობის სახელმწიფო ლიცენზირების ცენტრის - შპს "საპროექტო-სამშენებლო ინჟინერინგის" - დირექტორის მოადგილე და მთავარი ინჟინერი; მონაწილეობდა თბილისის სპორტის სასახლის, მეტროსადგურების "დიდუბისა" და "ისნის", საქართველოს რიგი ქალაქების (ბორჯომი, ქობულეთი, სამტრედია, ხაშური და სხვა) სარკინიგზო სადგურების, ამიერკავკასიისა და თურქმენეთის სამხედრო შტაბის დაპროექტებაში; უცხოეთში მოღვაწეობისას ხელმძღვანელობდა მნიშვნელოვანი სამრეწველო ნაგებობების დაპროექტება-მშენებლობას, ეროვნული კადრების (ინჟინერ-კონსტრუქტორების) მომზადებას; აქტიურად იყო ჩართული სამშენებლო ნორმების, ინსტრუქციების დამუშავებასა და ახალი ტექნიკის, ტექნოლოგიების, სტანდარტების დანერგვაში, ექსპერიმენტული მშენებლობის პროექტების დამუშავებაში, ავარიებისა და მიწისძვრებისაგან დაზიანებული შენობა-ნაგებობების სალვლევ-საძიებო და აღდგენა-სარეკონსტრუქციო სამუშაოებში; ტექნიკის მეცნიერებათა კანდიდატი; გამოქვეყნებული აქვს 40 სამეცნიერო ნაშრომი და საავტორო მოწმობა; არის მეცნიერების, განათლების, მრეწველობისა და ხელოვნების აშშ-ის საერთაშორისო აკადემიის ნამდვილი წევრი; დაჯილდოებულია სამახსოვრო მედლით.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.704-705

• საქართველოს ეროვნულ და სოციალურ ურთიერთობათა აკადემია, აკადემიკოსი
• საქართველოს საინჟინრო აკადემია, აკადემიკოსი

• საქართველოს დამსახურებული მშენებელი