ზაურ ხვედელიძე

დაბადების ადგილი: სოფელი ითხვისი, საჩხერის რაიონი.

დაამთავრა საქართველოს პოლიტექნიკური ინსტიტუტი საინჟინრო მექანიკის სპეციალობით 1971 წელს.

შრომითი საქმიანობა დაიწყო რიგითი ინჟინრის თანამდებობიდან და გაიარა პროფესიული ზრდის ყველა საფეხური ტრესტის მმართველამდე; სხვადასხვა დროს ხელმძღვანელობდა ისეთ სოლიდურ ორგანიზაციებს, როგორებიცაა დარგობრივი მართვის საინფორმაციო გამოთვლითი ცენტრი, თბილისის სატვირთო ავტოსატრანსპორტო საწარმოო გაერთიანების საექსპლუატაციო სამსახური და საქართველოს მშენებლობის სამინისტროს ავტოსატრანსპორტო ტრესტი "საქმშენტრანსი"; მონაწილეობდა თბილისის რიგი საცხოვრებელი მასივების, კონსტრუქციის მოედნის, თბილისის ასაქცევი გზისა და სხვა მნიშვნელოვანი ობიექტების მშენებლობაში; აქტიურად იყო ჩართული სომხეთისა და საქართველოს რეგიონებში მიწისძვრის შედეგთა სალიკვიდაციო სამუშაოებში; წლების განმავლობაში ნაყოფიერად მუშაობდა საქართველოს მშენებელთა საბჭოში; მონაწილეობს სამეცნიერო-ტექნიკური, არქიტექტურულ-სამშენებლო, ინტელექტუალურ-საპატენტო და ეკონომიკური ტერმინების მცირე განმარტებითი ლექსიკონის სარედაქციო კოლეგიის მუშაობაში; მიღებული აქვს სახელმწიფო ჯილდოები.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.720