ოთარ ჯღამაძე

დაბადების ადგილი: ქ. ქუთაისი.

დაამთავრა თბილისის რკინიგზის ტრანსპორტის ინჟინერთა ინსტიტუტის სამშენებლო ფაკულტეტი 1949 წელს; მოსკოვის სტალინის სახელობის რკინიგზის ტრანსპორტის ინჟინერთა ინსტიტუტის ასპირანტურა 1955 წელს.

1949-1953წწ. მუშაობდა "ზესტაფონ-ჭიათურის" რკინიგზის მშენებლობაზე სამშენებლო უბნის უფროსად; 1956-1957წწ. მოსკოვის სტალინის სახელობის რკინიგზის ტრანსპორტის ინჟინერთა ინსტიტუტში კათედრის ასისტენტად; 1957-1962წწ. ნოვოსიბირსკის რკინიგზის ტრანსპორტის ინჟინერთა ინსტიტუტში რკინიგზის მშენებლობისა და პროექტირების კათედრის დოცენტად; 1962-1964წწ. იყო საქართველოს მეცნიერებათა აკადემიის სამშენებლო მექანიკისა და სეისმომედეგობის ს/კ ინსტიტუტის უფროსი მეცნიერ-თანამშრომელი; 1964-1969წწ. საქართველოს საშენი მასალების ს/კ ინსტიტუტის ტექნიკურ-ეკონომიკური ლაბორატორიის ხელმძღვანელი; 1970 წლიდან მუშაობდა საქართველოს მშენებლობის (შემდგომში - ურბანიზაციისა და მშენებლობის) სამინისტროს მართვის ავტომატიზებული სისტემების გამოთვლითი ცენტრის ("საქმშენინფორმატიკა") დირექტორად; 1960-1975წწ. საქართველოს სამშენებლო დარგის ხელშემწყობ სამეცნიერო საბჭოში უძღვებოდა მშენებლობის ეკონომიკის სექციას; წლების განმავლობაში ხელმძღვანელობდა სამინისტროს ოპერატიული მართვის ავტომატიზებული სისტემის დამუშავებასა და ამოქმედებას, რიგ მნიშვნელოვან ობიექტებზე მშენებლობის ოპერატიული მართვის სისტემების ორგანიზებას; ტექნიკის მეცნიერებათა კანდიდატი; მშენებლობის ორგანიზაციისა და მართვის სფეროში მათემატიკური მეთოდებისა და გამოთვლითი ტექნიკის გამოყენების საკითხებზე (საქართველოში, რუსეთში, უკრაინასა და გერმანიაში) გამოქვეყნებული 80-ზე მეტი სამეცნიერო ნაშრომის ავტორი; დაჯილდოებულია სახალხო მეურნეობის მიღწევათა საკავშირო გამოფენის I ხარისხის მედლით, სსრკ მშენებლობის სამინისტროს სიგელით, საქართველოს სხვადასხვა სახელმწიფო ჯილდოებით.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.760

• საქართველოს დამსახურებული ინჟინერი

• მათემატიკური პროგრამირების გამოყენება საშენი მასალების მრეწველობაში (ავტორი). - თბილისი, საბჭოთა საქართველო, 1967. - 91გვ.