გიორგი ბარნაბიშვილი

დაბადების ადგილი: სოფელი მეტეხი, გორის რაიონი.

დაამთავრა თბილისის სათავადაზნაურო გიმნაზია 1906 წელს და ოდესის უნივერსიტეტის ფიზიკა-მათემატიკის ფაკულტეტი 1911 წელს.

სამხედრო სამსახურის მოხდის შემდეგ ასწავლიდა ყუბანის ტემირგოევის გიმნაზიაში, საიდანაც დაითხოვეს, როგორც "პოლიტიკურად არასაიმედო" (წარსულში იყო სტუდენტური არალეგალური ჟურნალის "განთიადის" გამომცემელი, იბეჭდებოდა ლითოგრაფიით, 100 ცალად). 1905 წლიდან თანამშრომლობდა ქართულ და რუსულ პრესასთან. 1913-1914 წწ. მუშაობდა გორის მაზრაში კოოპერაციისა და სახალხო ბანკების დარგში. პირველი მსოფლიო ომის დროს იყო კაზაკთა შენაერთის უფროსი ოფიცერი, მენშევიკების არმიაში - სამხედრო სკოლის საარტილერიო განყოფილების კაპიტანი. აქტიურად მონაწილეობდა სამხედრო სკოლასთან ჩამოყალიბებულ კომისიაში ქართული სამხედრო ტერმინოლოგიის შესაქმნელად. 1921 წლიდან მუშაობდა სამხედრო-საგამომცემლო დარგში სარედაქციო განყოფილების უფროსად და რედაქტორად, წერდა პოპულარულ წერილებს სამხედრო საქმისა და ქიმიის შესახებ, იყო სამხედრო სკოლის ფიზიკისა და ქიმიის ლექტორი (1927 წლამდე), 1930 წლიდან ამიერკავკასიის შრომის სამეცნიერო ინსტიტუტის ქიმიური ლაბორატორიის გამგე და უფროსი მეცნიერ-თანამშრომელი, სამთო-მეტალურგიული და ქიმიურ-ტექნოლოგიური ინსტიტუტის ანალიზური ქიმიის კათედრის ასისტენტი, 1933 წლიდან ინდუსტრიული ინსტიტუტის დოცენტი. 1934 წლიდან საკვალიფიკაციო კომისიის მიერ დამტკიცებულ იქნა ანალიზური ქიმიის კათედრის გამგედ. გიორგი ბარნაბიშვილი იკვლევდა საქართველოს სამთამადნო მაღაროების რეჟიმსა და წყლებს. ფერო-მარგანეცში აცეტილინის აირისა და ორთქლის გატარების შედეგად მიიღო ღვინის სპირტი. ქიმიურ მეცნიერებათა კანდიდატი.

საკანდიდატო დისეტაცია - "შხამიანი აირები და მტვრები და მათი გავრცელების ზონა", დაიცვა 1944 წელს.

წყარო: ქართველ მოღვაწეთა ლექსიკონი:1801-1952: ტ.I ./იოსებ იმედაშვილი -თბ.,2018.-გვ.310

• წყლის ქიმიური ანალიზის მეთოდები საველე საექსპედიციო პირობებში : მოკლე სახელმძღვანელო სტუდენტ გეოლოგებისათვის, ინჟენერებისათვის, საქარხნო ქიმიურ ლაბორატორიებისავის და ტექნიკოსებისათვის (ავტორი). - ტფილისი, ტექნიკა და შრომა-ს სტ., 1935. - 132გვ.
• ქსოვილების ბუნებისა და ღირსების შემოწმება : საქარხნო ლაბორატორიებისა და საფეიქრო საქარხნო სკოლების სახელმძღვანელო (ავტორი). - ტფილისი, პ/ტრ. 1-ლი სტ., 1932. - 53გვ.
• სურსათ-სანოვაგის ანალიზის მეთოდიკა : მოკლე სახელმძღვანელო (თანაავტორი). - ტფილისი, აღმასკომის სტამბა, 1927. - 1113გვ.
• ტფილისის ბაზრის სურსათ-სანოვაგე : ქალაქის ქიმიურ ლაბორატორიის გამოკვლევათა მიხედვით (თანაავტორი). - ტფილისი, ს.მ.უ.ს. პოლიგრაფტრესტის მე-4 სტამბა, 1925. - 39გვ.