ალექსანდრე გვენცაძე

დაბადების ადგილი: სოფ. ბარეული, ამბროლაურის რ-ნი.

დაამთავრა თბილისის სახელმწიფო უნივერსიტეტის ფილოლოგიის ფაკულტეტი 1929 წელს.

უნივერსიტეტის დამთავრებისთანავე სამუშოდ დატოვეს უნივერსიტეტის ლექსიკოლოგიურ განყოფილებაში (ხელმძ. აკად. აკაკი შანიძე); 1930 წლიდან დაიწყო პედაგოგიური მოღვაწეობა: მასწავლებლობდა ჯერ გურჯაანში, შემდეგ სიღნაღის და ბოლოს თელავის პედაგოგიურ სასწავლებლებში; 1939 წლიდან თელავის პედაგოგიური ინსტიტუტში მოღვაწეობდა; პროფესორ-მასწავლებელთაგან ერთ-ერთი პირველთაგანი იცავს დისერტაციას, ხელმძღვანელობს სხვადასხვა სტრუქტურულ განყოფილებას; იყო ფაკულტეტის დეკანი; ქართული ენისა და ლიტერატურის კათედრის გამგე; სამეცნიერო საბჭოს სწავლული მდივანი; ჰქონდა უამრავი საზოგადოებრივი დატვირთვა; ავტორია ბევრი გამოქვეყნებული სამეცნიერო-მეთოდური ნაშრომისა, რომელთაგან რამდენიმე გამოიცა, როგორც დამხმარე სახელმძღვანელო: "ქართული ენის რიცხვითი სახელი", "ზოგადი სტილისტიკის საფუძვლები", "ხალხური ზეპირსიტყვიერების ენა, როგორც ლინგვისტური სტილისტიკის საგანი", "ილია ჭავჭავაძის პოემა "განდეგილის" სტილისტური ანალიზი" და სხვ.; სტილისტიკისადმი მიძღვნილ გამოკვლევებში ჩამოაყალიბა თვალსაზრისი, რომლის მიხედვითაც ერთურთისგან უნდა გაიმიჯნოს "ენის კულტურა" და "ენის სტილი", რითაც, ფაქტობრივად, საფუძველი ჩაუყარა ლინგვისტური სტილისტიკის ახალ მიმართულებას ქართულ საენათმეცნიერო აზროვნებაში; საინტერესოა მისი სტატია - "ვაჟა-ფშაველას სამი პოემა" ("სტუმარ-მასპინძელი", "ალუდა ქეთელაური", "გველის მჭამელი"), რომელიც გამოაქვეყნა თელავის პედინსტიტუტის შრომების III ტომში, 1959 წელს; კითხულობდა ლექციებს ფუნდამენტურ საენათმეცნიერო დარგებში; ხელმძღვანელობდა სტუდენტთა პედაგოგიურ პრაქტიკას; ლექციებს კითხულობდა მასწავლებელთა დახელოვნების ინსტიტუტში; სისტემატურად მონაწილეობდა სამეცნიერო კონფერენციებისა და სესიების მუშაობაში; ყოველწლიურად აწყობდა სტუდენტთა სამეცნიერო ექსპედიციებს, სადაც მოიძია უძვირფასესი მასალა კახური დიალექტისა და ფოლკლორის შესასწავლად; ამასთანავე ეძებდა და სწავლობდა მივიწყებულ ხუროთმოძღვრულ ძეგლებს; თანამშრომლობდა რესპუბლიკურ და რაიონულ პრესასთან; ინტენსიური ურთიერთობა ჰქონდა კახეთის რეგიონის სკოლებთან; ათეული წლის განმავლობაში ხელმძღვანელობდა ინსტიტუტის სამეცნიერო ბიბლიოთეკის საბიბლიოთეკო საბჭოს; იყო თელავის სახელმწიფო თეატრის მხატვრული საბჭოს წევრი. ღვაწლმოსილი პედაგოგი, მეცნიერი და საზოგადო მოღვაწე.

წყარო: ქართული ენა: ენციკლოპედია. - თბ. 2008. - გვ.113.

• იაკობ გოგებაშვილის სახელობის თელავის სახელმწო უნივერსიტეტი, ერთ–ერთი დამაარსებელი
• სასვენი და წერა-ბეჭდვის ტექნიკის წიგნები

• ზოგადი სტილისტიკა : დამხმ. სახელმძღვ. პედ. ინ-ტის სტუდენტებისათვი (Author). - თბილისი, განათლება, 1991. - 79გვ.
• სასვენი და წერა-ბეჭდვის ტექნიკის წიგნები (Author). - თბილისი, 1981. - 41გვ.
• ქართული ენის რიცხვითი სახელი : დამხმ. სახელმძღვ. (Author). - თბილისი, 1972. - 113გვ.
• სტილისტიკის საკითხები : პედ. ინ-ტების ქართული ენისა და ლიტერატურის სპეც. სტუდენტებისათვის (Author). - თბილისი, თბილ. უნ-ტის გამ-ბა, 1971. - 60გვ.