ბაგრატ ბეთანელი

დაბადების ადგილი: ქ. ახალციხე.

1901 წლიდან ჯერ თბილისის კათოლიკეთა სკოლის, შემდეგ ახალციხის მაზრის სოფელ ტოლაშში მასწავლებლობდა, წერდა კორესპონდენციებს "ცნობის ფურცელსა" და "ივერიაში". 1902 წელს "ცნობის ფურცლის" დამატებაში გამოაქვეყნა თარგმნილი მოთხრობები: "დროშა", "ჰერცოგოვინელი ქალი". 1902 წლიდან მონაწილეობდა ახალციხესა და ბორჯომში დადგმულ წარმოდგენებში. 1903-1915 წწ. იყო სოციალ-ფედერალისტური პარტიის წევრი, იბრძოდა მეფის თვითმპყრობლობისა და სამღვდელოების წინააღმდეგ. 1912 წლიდან "სახალხო გაზეთში", "თემში" აქვეყნებდა პუბლიკაციებს: "სწავლა-განათლების მდგომარეობა ბალკანეთის ქვეყნებში", "სახალხო განათლება შვეიცარიაში", "ირლანდიის ჰომრული", "სკოლები ბულგარეთში" ("სახალხო გაზეთი", 1912, №748). 1915 წელს ჟურნალ "განათლებაში" გამოაქვეყნა "წერილი მეჯვრისხევიდან", სადაც სკოლების ინსპექტორს, რუსიფიკატორ ბერძენ პოლიტოვს ამხელდა. სამსახურიდან განთავისუფლების შემდეგ სოფელ აკაურთის ქართველთა შორის წერა-კითხვის გამავრცელებელი საზოგადოების სკოლაში ასწავლიდა. 1916 წელს გაზეთ "საქართველოში" წერდა კორესპონდენციებს, "ჯეჯილში"- მოთხრობებს: "ფინია და ნიკორა", "ფინიას გმირობა", "ვასიკოს დარდი", "იის კონა", "მურიას ოსტატობა"; ლექსებს - "სამშობლოს ნუგეში", "შობა", "ზამთარი". ასწავლიდა ქართულ სიმღერებს, ახლოს იცნობდა ლუარსაბ ბოცვაძეს. შეისწავლა ადამიანის ანატომია-ფიზიოლოგია, სამკურნალო მცენარეები. დაწერა გამოკვლევა "საქართველოს უშხამო სამკურნალო მცენარეები, მათი ბოტანიკური აღწერა, სამკურნალო თვისებანი და ხმარების წესები" (დარჩა ხელნაწერის სახით). საზოგადო მოღვაწე.     

წყარო: ქართველ მოღვაწეთა ლექსიკონი:1801-1952: ტ.I/იოსებ იმედაშვილი -თბ.,2018.-გვ.348