ქეთევან იაშვილი

დაბადების ადგილი: სოფელი შალაური, თელავის მუნიციპალიტეტი.

დაწყებითი განათლება თელავის წმინდა ნინოს სახელობის ქალთა სასწავლებელში მიიღო. 1900 წელს დაამთავრა  ხარკოვის სამედიცინო ინსტიტუტის ფარმაკოლოგიის ფაკულტეტი.

საქართველოში დაბრუნების შემდეგ თელავში კერძო აფთიაქში პროვიზორად დაიწყო მუშაობა; 1930-იან წლებში კოსმეტოლოგიით დაინტერესდა, ამ პროფესიას იგი ქ. პეტერბურგში დაეუფლა, სწავლის დამთავრების შემდეგ  თბილისში საკუთარ სახლში კოსმეტოლოგიური კაბინეტი გახსნა, სადაც სიცოცხლის ბოლომდე მუშაობდა; ქეთევან იაშვილი ცოლად გაჰყვა მოხეტიალე თეატრალური დასის წევრს, ნიკოლოზ კაზიევს, რომელიც მასავით კოლექციონერი იყო. " ნახევარ საუკუნეზე მეტია რაც ჩემი ხალხის ფიზიკურ მშვენიერებას ვემსახურები, მიზნად დავისახე მისი სულიერი მშვენიერებისთვისაც გამეწია ანგარიში, ამ მიზნით ვიძენდი ხელოვნების შესანიშნავ ქმნილებებს, რომლებიც შემდეგ ჩემს ხალხს, ერს, ჩემს სამშობლოს ვუძღვენი", - ეს ქეთევან იაშვილის სიტყვებია, რომელიც მან გარდაცვალებამდე დაწერა. იგი ღრმად მოხუცებულიც კი სხვადასხვა მსოფლიო დონის შედევრებით კოლექციის გამდიდრებას არ წყვეტდა, რომელიც შემდეგ თელავის ისტორიულ მუზეუმს უსახსოვრა. მის კოლექციაში მრავლად არის XVII-XVIII-XIX საუკუნეების დასავლეთ ევროპელ მხატვართა ნაწარმოებები,  XIX- XX საუკუნეების რუსული სკოლის წარმომადგენლების და XIX- XX საუკუნეების ქართული და უცხოური ქვეყნების ფერწერის ნიმუშები. კოლექციაში დაცულია 187-მდე  რუსული, ჰოლანდიური, გერმანული და ფრანგული ფერწერის საუკეთესო ნიმუშები და ასევე  ელენე ახვლედიანის, ლ. გუდიაშვილის და სხვა ლეგენდარული მხატვრების ნამუშევრები. ფარმაცევტი, საზოგადო მოღვაწე.

წყარო: თელავის საპატიო ხმა: knews.ge; ქართული ვებგვერდი კულტურასა და ხელოვნებაზე: artinfo.ge

• 1963 - თელავის საპატიო მოქალაქე