მერაბ თვალჭრელიძე

დაბადების ადგილი: ქ. თბილისი.

დაამთავრა თბილისის სახელმწიფო უნივერსიტეტის გეოგრაფია-გეოლოგიის ფაკულტეტი გეოლოგიის სპეციალობით.

1975 წელს მუშაობა დაიწყო ვახუშტი ბაგრატიონის სახელობის გეოგრაფიის ინსტიტუტში მეოთხეული გეოლოგიის, ხოლო 1981 წლიდან გეომორფოლოგიისა და პალეოგეოგრაფიის განყოფილებაში. 1982-1986წწ. დაუსწრებელი ასპირანტურის კურსი გაიარა ალ. ჯანელიძის სახელობის გეოლოგიურ ინსტიტუტში (ლითოლოგიის განყოფილება). 1989 წელს სამუშოდ გადავიდა ალ. ჯანელიძის სახელობის გეოლოგიური ინსტიტუტის ლითოლოგიურ განყოფილებაში უფროსი მეცნიერ თანამშრომლის თანამდებობაზე; 1991 წლიდან არის სედიმენტოლოგიისა და ლითოლოგიის სექტორის ხელმძღვანელი; 1992 წლიდან შეთავსებით მუშაობდა ვახუშტი ბაგრატიონის სახელობის გეოგრაფიის ინსტიტუტის პალეოგეოგრაფიის ლაბორატორიაში უფროსი მეცნიერ თანამშრომლის თანამდებობაზე. გამოქვეყნებული აქვს 70-მდე სამეცნიერო ნაშრომი, რომლებიც ეხება ადამიანისა და გარემოს ურთიერთობის საკითხს მეოთხეულ პერიოდში, შავი ზღვის უახლეს გეოლოგიურ ისტორიას, ანთროპოგენური და ბუნებრივი ფაქტორების როლის შეფასებას შავი ზღვის ეკოსისტემებზე. გეოლოგია-მინერალოგიის მეცნიერებათა კანდიდატი.

საკანდიდატო დისერტაციის თემა - "შავი ზღვის სამხრეთ-აღმოსავლეთი სანაპირო ზონის თანამედროვე ნალექების ლითოლოგია", დაიცვა 1988 წელს.

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.134;  წიგნი ღირსებისა: ტ. 6/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2003. - გვ.52

• 2001 - ღირსების ორდენი