პოლიკარპე დოლიძე

დაბადების ადგილი: სოფელი ამაღლება, ჩოხატაურის რაიონი.

დაამთავრა სამხედრო-საფერშლო სკოლა (1915), თბილისის სახელმწიფო უნივერსიტეტის სამკურნალო ფაკულტეტი (1925-1931) და ასპირანტურა (1932-1938).

ასპირანტურაში სწავლის დროს დაწერა რამდენიმე შრომა. მათ შორის: "ღვიძლის ჩირქგროვები" ("საბჭოთა მედიცინა",  1938, №1), "მძიმე ანურიის შემთხვევა ორმხრივი ჰიდრონეფროზით" ("საბჭოთა მედიცინა", № 3-4) და სხვ. 1938 წელს საჯაროდ დაიცვა დისერტაცია მედიცინის მეცნიერებათა კანდიდატის ხარისხის მოსაპოვებლად: "ინფიცირებული ჭრილობების მკურნალობა ულტრაიისფერი სხივებით" (თბ.: საქმედგამი, 1939), ხოლო 1940 წლის 16 ივნისს ლენინგრადის კიროვის სახელობის ექიმთა დახელოვნების სახელმწიფო  ინსტიტუტში სადოქტორო დისერტაცია თემაზე: "Влияние лучистой энергии (рентгеновых ультрафиалетовых лучей и электрического поля ультравысокой частоты) на регенерацию неинфицированных ран" -"არაინფიცირებული ჭრილობების რეგენერაციაზე სხივური ენერგიის (რენტგენის, ულტრაიისფერი და ელექტრონული ველის ულტრამაღალი სიხშირის) გავლენა". ამ დისერტაციას  სამხედრო მიმართულებით  დიდი თეორიული და პრაქტიკული მნიშვნელობა მიენიჭა, პრესაში გამოქვეყნდა სტატია: "Ценная научная работа" ("Зария Востока", 1940, 5 сентября, №206). 1916-1917 წლებში იმყოფებოდა სამხედრო სამსახურში, თურქეთის ფრონტსა და ზურგში ეწეოდა აქტიურ ბოლშევიკურ-რევოლუციურ პროპაგანდას. 1918-1923 წლებში სოფელ ამაღლების საექიმო პუნქტის გამგედ ყოფნის პერიოდშიც გლეხებს შორის აგიტაციას უწევდა საბჭოთა წყობილებას. 1930-1932 წლებში იყო საქართველოს მედსანშრომის კავშირის ცეკას თავმჯდომარე, 1837-1938 წლებში საქართველოს ჯანსახკომის ცენტრალური კლინიკური საავადმყოფოს დირექტორი, 1938-1939 წლებში ექიმთა დახელოვნების ინსტიტუტის დირექტორი. ქირურგი.

წყარო: ქართველ მოღვაწეთა ლექსიკონი, 1801-1952: ტ. I ა-დ / იოსებ იმედაშვილი.-თბ.,2018.-გვ.883

• ინფიცირებული ჭრილობების მკურნალობა ულტრაიისფერი სხივებით : კლინიკურ-ექსპერიმენტული დაკვირვება (ავტორი). - თბილისი, საქმედგამი და სტამბა, 1939. - 43გვ.