იოსებ საღინაძე

დაბადების ადგილი: სოფელი ლუხვანო, ცაგერის რაიონი.

დაამთავრა ცაგერის ჰუმანიტარული ტექნიკუმი 1924 წელს; დაამთავრა თბილისის სახელმწიფო პედაგოგიური ინსტიტუტის გეოგრაფია-გეოლოგიის ფაკულტეტი 1934 წელს.

1924-1927წწ. მასწავლებლად მუშაობდა სოფ. ლუხვანოს დაწყებით სკოლაში; 1927-1929წწ. ცაგერის რაიონის საცდელ-საჩვენებელი სკოლის გამგედ; 1930 წელს ცაგერის საშუალო სკოლაში გეოგრაფიის მასწავლებლად; 1934-1936წწ. მუშაობდა ცაგერის რაიონის განათლების განყოფილების სასკოლო ინსპექტორად; 1936-1938წწ. ცაგერის პედაგოგიურ და სასოფლო-სამეურნეო ტექნიკუმში ასწავლიდა გეოგრაფიას, მუშაობდა რაიონის მეთოდ-კაბინეტის გამგედ; 1938 წლიდან მუშაობდა ქუთაისის საელმწიფო პედაგოგიურ ინსტიტუტში; კითხულობდა ლექციების კურსს მინერალოგია-პეტროგრაფიასა და გეოლოგიაში საბუნებისმეტყველო-გეოგრაფიის ფაკულტეტზე; 1942-1947წწ. იყო ფაკულტეტის დეკანი. გამოქვეყნებული აქვს 50-ზე მეტი სამეცნიერო ნაშრომი, მათ შორის სახელმძღვანელოები და მონოგრაფიები. მისი სამეცნიერო თემატიკა ძირითადად მოიცავდა იმერეთის დანალექი და მაგმური ქანების მინერალოგიურ-პეტროგრაფიულ კვლევას. გეოლოგია-მინერალოგიის მეცნიერებათა კანდიდატი, დოცენტი.

საკანდიდატო დისერტაციის თემა - "ქალაქ ქუთაისის რაიონის სამშენებლო მასალების მინერალოგიურ-პეტროგრაფიული დახასიათება", დაიცვა 1950 წელს.

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.230

• ზოგადი გეოლოგიის პრაქტიკუმი : დამხმ. სახელმძღვ. პედ. ინ-ტების საბუნებისმეტყველო-გეოგრ. ფაკ-ტის სტუდენტებისათვის (თანაავტორი). - თბილისი, განათლება, 1967. - 167გვ.
• სასწავლო გეოლოგიური ექსკურსიები ქუთაისის მიდამოებში : მეთოდ. მითითებანი (ავტორი). - თბილისი, ცოდნა, 1961. - 65გვ.
• ქუთაისის რაიონის მარმარილოების მინერალოგიურ-პეტროგრაფიული დახასიათება (ავტორი) // ქუთაისის სახ. პედ. ინ-ტის შრომები, ტ. IX. - ქუთაისი, 1949. - 81-109გვ.
• წყალტუბოს ვულკანური ყელის პეტროგრაფია (ავტორი) // ქუთაისის პედინსტიტუტის შრომები ტ. III. - ქუთაისი, 1941. - 145-154გვ.