თინათინ ფავლენიშვილი

დაბადების ადგილი: სოფელი ქვემო ნიქოზი, გორის რაიონი.

დაამთავრა თბილისის სახელმწიფო უნივერსიტეტის გეოგრაფია-გეოლოგიის ფაკულტეტი გეომორფოლოგიის სპეციალობით 1947 წელს.

მუშაობა დაიწყო თბილისის სახელმწიფო პედაგოგიურ ინსტიტუტში გეოგრაფიის კათედრის ასისტენტად, შემდეგ მასწავლებლად, უფროს მასწავლებლად. ლექციებს კითხულობდა ზოგად დედამიწისმცოდნეობაში, მატერიკების ფიზიკურ გეოგრაფიაში, საქართველოს ფიზიკურ გეოგრაფიაში. აგრეთვე უძღვებოდა სტუდენტთა პედაგოგიურ პრაქტიკას; 1950 წელს სამუშაოდ გადავიდა გორის ნიკოლოზ ბარათაშვილის სახელობის სახელმწიფო პედაგოგიურ ინსტიტუტში გეოგრაფიის კათედრის უფროს მასწავლებლად; 1957 წელს კვლავ დაბრუნდა თბილისის სახელმწიფო პედაგოგიურ ინსტიტუტში უფროსი მასწავლებლის თანამდებობაზე; 1969 წლიდან ამავე ინსტიტუტში იყო დოცენტის თანამდებობაზე; 1947-1950წწ. გაიარა ასპირანტურის კურსი. გამოქვეყნებული აქვს 20-ზე მეტი სამეცნიერო ნაშრომი. გარდა ამისა, წლების განმავლობაში ასრულებდა წლიურ სამეცნიერო-მეთოდურ სამუშაოებს და აბარებდა კათედრას, რომელიც ინახება ინსტიტუტის ბიბლიოთეკის ფონდებში. იგი ეწეოდა მთარგმნელობით მუშაობას. მის მიერ თარგმილი და გამოქვეყნებულია სახელმძღვანელოები სტუდენტებისათვის - ს. კალესნიკი, "ზოგადი დედამიწისმცოდნეობის მოკლე კურსი" (თბ., 1965), ს. კალესნიკი, დედამიწის ზოგადი გეოგრაფიული კანონზომიერებანი (თბ., 1977), ასევე რედაქტირებას უწევდა თარგმნილ სასწავლო პროგრამებს. გეოგრაფიულ მეცნიერებათა კანდიდატი, დოცენტი (1969). 

საკანდიდატო დისერტაციის თემა - "აჭარა-თრიალეთის მთიანი სისტემის შუა ნაწილის (ბორჯომისა და მისი მიდამოების) გეომორფოლოგიური დახასიათების ცდა", დაიცვა 1955 წელს.

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.248