ალა ჩიგირი

დაბადების ადგილი: ქ. ტყვარჩელი.

დაამთავრა თბილისის ალ. პუშკინის სახელობის სახელმწიფო პედაგოგიური ინსტიტუტი ბიოლოგია-გეოგრაფიის სპეციალობით 1965 წელს. 

საშუალო სკოლის დამთავრების შემდეგ მუშაობდა II და IV ჰიდროგეოლოგიურ ექსპედიციებში ტექნიკოსად და "თბილგვირაბმშენში" სამარკშაიდერო განყოფილებაში. მონაწილეობდა ამიერკავკასიის, შუა აზიის და პამირის ფიზიკურ-გეოგრაფიული პირობების კვლევებში; ინსტიტუტის დამთავრების შემდეგ, 1965 წელს, მუშაობა განაგრძო ამიერკავკასიის გეოლოგიურ პარტიაში ინჟინრის თანამდებობაზე; 1970 წელს დაუსწრებლად დაამთავრა თბილისის ალ. პუშკინის სახელობის სახელმწიფო პედაგოგიური ინსტიტუტის ასპირანტურა ფიზიკური გეოგრაფიის განხრით; 1976-1992წწ. მუშაობდა ვახუშტი ბაგრატიონის სახელობის გეოგრაფიის ინსტიტუტში უმცროსი მეცნიერ-თანამშრომლის თანამდებობაზე. გამოქვეყნებული აქვს 10 სამეცნიერო ნაშრომი, რომლებიც ძირითადად შეეხება ჰიდროტექნიკურ ნაგებობათა და გარემოს ურთიერთზემოქმედების (აქვალური ლანდშაფტი) საკითხებს.

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.278