თეიმურაზ ხელაძე

დაბადების ადგილი: ქ. სამტრედია.

დაამთავრა თბილისის სახელმწიფო უნივერსიტეტის ფიზიკის ფაკულტეტი გეოფიზიკის სპეციალობით 1973 წელს.

მუშაობდა თბილისის სახელმწიფო უნივერსიტეტის გეოფიზიკის კათედრაზე, შემდეგ მ. ნოდიას სახელობის გეოფიზიკისა და ჰიდრომეტეოროლოგიურ ინსტიტუტებში უფროს მეცნიერ-თანამშრომლად. მის სამეცნიერო შრომებში განხილულია კლიმატური ველების მოდელირება მთიანი რაიონებისთვის მეტეოსადგურებით იშვიათი ქსელის შემთხვევაში, თეორიული მიდგომის საფუძვლები და გამოკვლევის მეთოდები. დაამუშავა მეტეოროლოგიური სადგურების, ობიექტური კლასიფიკაციის მეთოდიკა ფიზიკურ-გეოგრაფიული მდებარეობის მიხედვით. გამოავლინა რელიეფის გავლენის მექანიზმი კლიმატური ველების ფორმირებაზე სინოპტიკური პროცესების გათვალისწინებით; დაამუშავა კლიმატური ველების მეთემატიკურ-კარტოგრაფიული მოდელირების მეთოდები. გამოქვეყნებული აქვს რიგი სამეცნიერო ნაშრომები. გეოგრაფიულ მეცნიერებათა კანდიდატი.

საკანდიდატო დისერტაციის თემა - "კლიმატური ველების მათემატიკურ-კარტოგრაფიული მოდელირება რელიეფის მორფომეტრული ფაქტორების გათვალისწინებით კავკასიონის სამხრეთ ფერდობისათვის (საქართველოს ფარგლებში)", დაიცვა 1988 წელს.

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.308