დავით თაქთაქიშვილი

დაბადების ადგილი: ქ. თბილისი.

სამწვრთნელო საქმიანობა 2014 წელს "სასკო" თბილისის მთავარი მწვრთნელის ასისტენტად დაიწყო; იმავე წლის დეკემბრიდან "მარკ სტარზის" მთავარი მწვრთნელი ხდება; მისი ხელმძღვანელობით გუნდი რამაზ შენგელიას სახელობის თასის ფინალში გადის; 2015 წლის გაზაფხულიდან ახმეტის "ბახტრიონში" აგრძელებს მუშაობას; 2016 წლიდან საფეხბურთო კლუბ "თბილისის" მთავარი მწვრთნელია; 2016–2018წწ. "მარკ სტარზის" სპორტულ დირექტორად მუშაობს; 2017 წელს მის მიერ მომზადებულმა მზრუნველობა მოკლებული, სოციალურად დაუცველი და დევნილი ბავშვებისგან დაკომპლექტებულმა საქართველოს ბავშვთა საფეხბურთო ნაკრებმა მოსკოვის საერთაშორისო ფესტივალზე მიიღო მონაწილეობა, სადაც მე-4 ადგილი დაიკავა; მის მიერ გაწვრთნილმა საქართველოს ბავშვთა ნაკრებმა ჩემპიონატი ისე ჩაატარა, რომ გოლი არ გაუშვია; ქართველმა ბავშვებმა ჯგუფურ ეტაპზე ერთი შეხვედრა ფრედ (0–0) დაასრულეს, ხოლო ორ შეხვედრაში ერთნაირი ანგარიშით (1–0) გაიმარჯვეს; ნახევარფინალურ ჯგუფში ლატვიის ბავშვთა ნაკრებს მოუგეს (3–0) და მხოლოდ პენალტების სერიაში დათმეს შეხვედრა მასპინძელ რუსეთის ბავშვთა ნაკრებთან (1–2). საბოლოოდ, გუნდი მე-4 ადგილზე გავიდა; 2018 წლიდან "დინამო" სოხუმის მთავარ მწვრთნელად ინიშნება; კლუბსა და მწვრთნელს შორის კონტრაქტი 2020 წლის 31 დეკემბრამდე გაფორმდა; მისი ხელმძღვანელობით გუნდმა ორი სეზონი ჩაატარა, რომლის განმავლობაში სოხუმის "დინამომ" 58 ოფიციალური მატჩი გამართა. აქედან 27 შეხვედრაში გაიმარჯვება მოიპოვა, 20 შეხვედრა დათმო, ხოლო 11 მატჩი ფრედ დაასრულა; 2020 წლიდან კლუბში გენერალური დირექტორის პოზიციასაც ითავსებს; ამავე წლიდან "დინამო" სოხუმის ქალთა საფეხბურთო გუნდის მთავარ მწვრთნელად ინიშნება, რომელიც საქართველოს ეროვნული ჩემპიონატის უმაღლეს ლიგაში ასპარეზობს; მის სახელს უკავშირდება, აგრეთვე, კლუბში საფეხბურთო აკადემიის ჩამოყალიბება და საქართველოს ისტორიაში პირველი ქალთა საფეხბურთო აკადემიის შექმნა; ფეხბურთელი და ფეხბურთის მწვრთნელი; თამაშობდა მეკარის პოზიციაზე; იცავდა საქართველოს ფუტსალის უმაღლესი ლიგის მონაწილე საფეხბურთო კლუბ თბილისის "გრანდის" ღირსებას. აფხაზური ფეხბურთის განვითარებაში შეტანილი განსაკუთრებული წვლილისთვის 2020 წელს აფხაზეთის ავტონომიური რესპუბლიკის განათლების და კულტურის სამინისტროს მიერ იქნა დაჯილდოვებული. 

წყარო: გაზეთი "ლელო": lelo.ge; xnews.ge