კოლია ჭუმბურიძე

დაბადების ადგილი: სოფელი ქვედა სიმონეთი, იმერეთი.

ნიკოლოზ ჭუმბურიძე იურიდიულ ფაკულტეტზე სასწავლებლად პეტერბურგში გაემგზავრა, საბოლოოდ კი პრაღის უნივერსიტეტი დაამთავრა.

სხვადასხვა ჟურნალ-გაზეთებთან იგი "აჟის" ფსევდონიმით თანამშრომლობდა. საქართველოს გასაბჭოების შემდეგ, დაახლოებით ექვსი თვე სამშობლოში დარჩა და გარკვეულ ხანს გრიგოლ ლორთქიფანიძესა და შალვა მაღლაკელიძესთან ერთად "ჩეკას" სარდაფში ატარებდა; 1921 წლის 21 მაისს დააპატიმრეს; 1921 წლის 20 სექტემბერს, სტამბოლში მყოფ საქართველოდან განდევნილი მთავრობის წევრებს მან წარუდგინა მოხსენება: "საბჭოთა  საქართველოს ცხოვრებიდან – ბოლშევიკების ექვსი თვის ბატონობის სურათი"; ეს დოკუმენტი ინახება საქართველოს საისტორიო ცენტრალურ არქივში და დღესაც დიდ ინტერესს იწვევს; 2013 წელს ეროვნულმა არქივმა ეს ნაშრომი გამოსცა დიმიტრი სილაგაძის წინასიტყვაობითა და კომენტარებით; 1921 წელს, ციხიდან გამოსვლის შემდეგ, ნიკოლოზ ჭუმბურიძე ემიგრაციაში ცხოვრობდა. იგი კვლავ აქტიურად აგრძელებდა ქართულ ჟურნალ-გაზეთებთან თანამშრომლობას, მაგრამ ამჯერად უკვე "ალფას" ფსევდონიმით; ეს გაზეთები იყო "კავკასიონი", "დამოუკიდებელი საქართველო", "მხედარი", "ბრძოლა", "სამშობლოსთვის" და ასე შემდეგ; ემიგრაციაში მას ტუბერკულოზი შეეყარა; იგი ამ საშინელი დაავადებით 8 წელი იტანჯებოდა. ქართველ სოციალ-დემოკრატთა ერთ-ერთი ლიდერი.

წყარო: ქართული ემიგრანტული ჟურნალისტიკის ისტორია. ტ. 6/გურამ შარაძე.-თბ., 2005.-გვ.234–236; საქართველოს ეროვნული არქივი: archive.gov.ge