გივი ხუსკივაძე

დაბადების ადგილი: ქ. თბილისი.

დაამთავრა თბილისის სახელმწიფო უნივერსიტეტის მექანიკა-მათემატიკის ფაკულტეტი 1955 წელს; ასპირანტურა - 1958 წელს.

სამეცნიერო და პედაგოგიურ მოღვაწეობას ა. რაზმაძის სახელობის მათემატიკის ინსტიტუტსა და თბილისის სახელმწიფო უნივერსიტეტში ეწეოდა; 1958 წლიდან (გარდაცვალებამდე) მუშაობდა თბილისის ა. რაზმაძის სახელობის მათემატიკის ინსტიტუტში: 1958-1965წწ. - უმცროსი მეცნიერ-თანამშრომელი; 1965-1989წწ. - უფროსი მეცნიერ-თანამშრომელი (სპეციალობით ფუნქციონალური ანალიზი და ფუნქციათა თეორია); 1989-2006წწ. - წამყვანი მეცნიერ-თანამშრომელი; 2006 წლიდან უფროსი მეცნიერ-თანამშრომელი; პარალელურად, 1965-1986წწ. მუშაობდა თბილისის სახელმწიფო უნივერსიტეტის უმაღლესი სკოლის მასწავლებელთა კვალიფიკაციის ამაღლების ფაკულტეტის მათემატიკისა და მექანიკის კათედრაზე. მისი სამეცნიერო კვლევის სფეროა: ანალიზურ ფუნქციათა (მათ შორის, კონფორმულ ასახვათა) სასაზღვრო თვისებები; შეუღლებული ფუნქციები, კოშის ტიპის ინტეგრალი, კოშის სინგულარული ოპერატორი, წილადური ინტეგრალები; ანალიზურ და ჰარმონიულ ფუნქციათა თეორიის სასაზღვრო ამოცანები. მის მიერ შედგენილია ე.წ. L ინტეგრალი, რომლის მეშვეობით შესწავლილია სინგულარული და კოშის ტიპის ინტეგრალთა თვისებები. ამავე ინტეგრალის გამოყენებითაა შესწავლილი წრფივი შეუღლების ამოცანა სასაზღვრო წირისა და მონაცემთა მიმართ უზოგადეს პირობებში. ფიზიკა-მათემატიკის მეცნიერებათა დოქტორი (1999).

წყარო: საქართველოს მათემატიკოსები და მექანიკოსები: ბიოგრაფიული ცნობარი/ნოდარ მახვილაძე. -თბ., 2016. -გვ.308-309