ოთარ გედევანიშვილი

დაბადების ადგილი: ქ. თბილისი.

დაამთავრა ამიერკავკასიის ინდუსტრიული ინსტიტუტის სამთო ფაკულტეტი 1940 წელს.

შრომითი საქმიანობა დაიწყო ტრესტ "საქნავთობის" სისტემაში. ომის დაწყებისთანავე გაიწვიეს საბჭოთა არმიის რიგებში; 1944 წელს, დემობილიზაციის შემდეგ, დაინიშნა ტყვარჩელის გასამხედროებულ სამთომაშველთა ოცეულის უფროსად; 1945 წელს გადაყვანილ იქნა ამიერკავკასიის გასამხედროებულ სამთომაშველთა ნაწილის შტაბში, სადაც განვლო დიდი გზა რიგითი ინსპექტორიდან ამიერკავკასიის შტაბის უფროსამდე; 1951 წელს გადაიყვანეს სამთო-ტექნიკური ზედამხედველობის კომიტეტში, სადაც მუშაობდა 1961 წლამდე ჯერ სამთომაკონტროლებელ ინჟინრად, შემდეგ - ტექნიკური განყოფილების უფროსად; 1961 წელს საკავშირო ნახშირის მრეწველობის მინისტრის ბრძანებით კვლავ დააბრუნეს სამთომაშველთა სისტემაში და 12 წლის განმავლობაში ხელმძღვანელობდა საქართველოს სამთომაშველთა სამსახურს; 1973-1976 და 1979-1982 წლებში მუშაობდა საქართველოს ტექზედამხედველობის სახელმწიფო კომიტეტში ტექნიკური განყოფილების უფროსად. დიდი ღვაწლი მიუძღვის საქართველოში სამთომაშველთა სამსახურის ჩამოყალიბებასა და განვითარებაში; როგორც მაღალკვალიფიციური სპეციალისტი, მონაწილეობდა საქართველოს სამეცნიერო-ტექნიკური სამთო საზოგადოების მუშაობაში. მიღებული ჰქონდა სახელმწიფო ჯილდოები, მათ შორის, მრავალი ორდენი და მედალი.

წყარო: გამოჩენილი ინჟინრები და მეცნიერები: კრებული/შემდგ.: მიტროპოლიტი ანანია ჯაფარიძე [და სხვ.]. -თბ., 2012. -გვ.41

• 1961 - საქართველოს დამსახურებული ინჟინერი