გურამ გვეტაძე

დაიბადების ადგილი: ქ. გურჯაანი.

დაამთავრა საქართველოს პოლიტექნიკური ინსტიტუტის მექანიკა-მანქანათმშენებლობის ფაკულტეტი 1955 წელს. ინსტიტუტის დამთავრების შემდეგ განაწილებით მუშაობა დაიწყო კიროვის სახელობის თბილისის ჩარხმშენებელ ქარხანაში, ინჟინერ-კონსტრუქტორად, შემდეგ კი აირჩიეს კომკავშირის კომიტეტის მდივნად; 1956-1963წწ. მუშაობდა საქართველოს კომკავშირის ცენტრალური კომიტეტის ინსტრუქტორად, საქართველოს სახალხო მეურნეობის საბჭოს მანქანათმშენებლობის სამმართველოს ინჟინრად და კომკავშირის საქალაქო კომიტეტის ინსტრუქტორად; 1963 წლის 18 ოქტომბრიდან 1965 წლის 30 ივნისამდე იყო საქართველოს კპ ქ. თბილისის ლენინის რაიონული კომიტეტის მდივანი; 1965 წლის 30 ივნისიდან 1969 წლის 16 ივნისამდე მუშაობდა საქართველოს საზოგადოებრივი წესრიგის დაცვის სამინისტროს მილიციის სამმართველოს უფროსის მოადგილედ; 1969 წლის 16 ივნისიდან 1972 წლის 22 აგვისტომდე საქართველოს სსრ შსს სოციალისტური საკუთრების დატაცებისა და სპეკულაციის წინააღმდეგ ბრძოლის სამმართველოს უფროსად; 1969 წლის 16 ივნისიდან 1976 წლის 20 ივლისამდე იყო საქართველოს სსრ შინაგან საქმეთა სამინისტროს კოლეგიის წევრი; 1972 წლის 22 აგვისტოდან 1976 წლის 20 ივლისამდე მუშაობდა საქართველოს შს მინისტრის მოადგილედ; 1975 წლის 31 ოქტომბერს მიენიჭა მილიციის გენერალ-მაიორის წოდება; 1976 წლის 20 ივლისიდან 1977 წლის 8 თებერვლამდე იყო საქართველოს კომპარტიის ცენტრალური კომიტეტის ადმინისტრაციული ორგანოების განყოფილების უფროსის მოადგილე; 1977 წლის 8 თებერვლიდან ამავე განყოფილების უფროსი; 1979 წლის 26 მაისიდან 1986 წლის 21 იანვრამდე იყო საქართველოს სსრ შინაგან საქმეთა მინისტრი; 1986 წლის 28 იანვრიდან 1987 წლის 7 აგვისტომდე მუშაობდა საქართველოს კპ ცკ-ის პირველი მდივნის თანაშემწედ სამობილიზაციო საქმეში; 1982 წლის 17 თებერვალს მიენიჭა შინაგანი სამსახურის გენერალ-ლეიტენანტის წოდება; შს ორგანოებში მუშაობის პერიოდში წახალისებულ იქნა 24-ჯერ; 1986 წლიდან 1992 წლამდე მუშაობდა საქართველოს საგეგმო კომიტეტის მეორე განყოფილების უფროსად; 1992-1996წწ. საქართველოს ფინანსთა მინისტრის მოადგილედ, ძალოვანი უწყებების დაფინანსების საკითხთა კურატორად; 2002 წელს მუშაობდა საქართველოს ვეტერანთა საქმეების სახელმწიფო დეპარტამენტის თავმჯდომარის პირველ მოადგილედ; საქართველოს კპ თბილისის ლენინის რაიკომისა და ბიუროს წევრი (16.03.1963 — 27.01.1966); საქართველოს კპ ცკ-ის წევრი (24.01.1981-დან); იყო თბილისის მშრომელთა დეპუტატების ლენინის რაიონული საბჭოს X მოწვევის დეპუტატი (21.03.1965 — 19.03.1967), საქართველოს სსრ უმაღლესი საბჭოს IX-XI მოწვევების დეპუტატი (15.06.1979 — 24.02.1985); დაჯილდოებულია სხვადასხვა სახელმწიფო ჯილდოთი.

წყარო: XX საუკუნის საქართველოს შინაგან საქმეთა და უშიშროების მინისტრები /თუშურაშვილი ო., ჯახუა ი. - თბ., 2013. - გვ.83-84; წიგნი ღირსებისა: ტ. 1/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2000. - გვ.421; სსპი - ვეტერანების სახელმწიფო სამსახური: m.facebook.com

• 1996 - ვახტანგ გორგასლის II ხარისხის ორდენი
  საქართველოში მართლწესრიგისა და კანონიერების განმტკიცების საქმეში გამოჩენილი მაღალი პროფესიონალიზმისათვის, თავდადებული სამსახურისა და საქართველოს სახელმწიფო ბიუჯეტის ფორმირებაში, ეროვნული ზარაფხანის ჩამოყალიბებაში შეტანილი მნიშვნელოვანი წვლილისათვის

• გენერლის მოგონებათა ზარდახშა (ავტორი). - თბილისი, 2012. - 460გვ.. - ISBN: 978-9941-0-4332-1
• მართლწესრიგის სადარაჯოზე (ავტორი). - თბილისი, 1983. - 31გვ.