ზაზა ბაწელაშვილი

დაბადების ადგილი: სოფელი არაშენდა, გურჯაანის რაიონი.

1960-1964წწ. სწავლობდა შოთა რუსთაველის სახელობის სახელმწიფო თეატრალური ინსტიტუტის სამსახიობო ფაკულტეტზე; 1958 წელს დაუსწრებლად დაამთავრა ა. პუშკინის სახელობის სახელმწიფო პედაგოგიური ინსტიტუტის ფილოლოგიის ფაკულტეტი, იქვე ხელმძღვანელობდა სტუდენტურ თეატრს.

იყო კ. მარჯანიშვილის სახელობის სახელმწიფო აკადემიური თეატრის მსახიობი. შესრულებული აქვს შემდეგი როლები: ლექსო (ნოდარ დუმბაძის "მზიანი ღამე"), ლევანი (მიხეილ ჯავახიშვილის "ქალის ტვირთი"), არჩემაშვილი (გურამ ფანჯიკიძის "მეშვიდე ცა"), მდივანი (პოლიკარპე კაკაბაძის "ყვარყვარე თუთაბერი"), პრინცი ესკალური (შექსპირის "რომეო და ჯულიეტა"), ალექსასი ("ანტონიუსი და კლეოპატრა"), მისანი ("იულიუს კეისარი") და სხვ. საუკეთესო საბავშვო მოთხრობისათვის ორჯერ მიიღო ჟურნალ "პიონერის" პრემია. ზაზა ბაწელაშვილმა საქართველოს ტელევიზიაში შექმნა მხატვრულ გადაცემათა ციკლი ისტორიულ თემაზე საერთო სათაურით - "ზარი მეფობისაი", რომლის ავტორიცა და შემსრულებელიც თვითონ იყო, მომზადებული აქვს გადაცემები; "დავით აღმაშენებელი", "ვახტანგ გორგასალი", "თამარ მეფე". იყო ოთხნაწილიანი სატელევიზიო ფილმის "ფარსმან ქველის" მემატიანე-მთხრობელი. თეატრალური საზოგადოების მიერ გამართულ მხატვრული კითხვის კონკურსებზე მიღებული ჰქონდა ნიკოლოზ ბარათაშვილის სახელობის I ხარისხის პრემია, ვლადიმერ მაიაკოვსკის სახელობის II ხარისხის პრემია, შოთა რუსთაველის სახელობის II ხარისხის პრემია, საქართველოს პროფკავშირებისა და მწერალთა კავშირის III ხარისხის პრემია (პიესა "მეწისქვილე").

წყარო: კახეთის გამოჩენილი ადამიანები/ოთარ ნაცარაშვილი.-თბ.,2001.-გვ.465;  წიგნი ღირსებისა: ტ. 4/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2002. - გვ.302

• 1999 - ღირსების მედალი
  ქართული კულტურის განვითარებაში, მის პოპულარიზაციაში, კულტურულ - საგანმანათლებლო საქმიანობაში შეტანილი დიდი პირადი დიდი წვლილისათვის, ნაყოფიერი შემოქმედებითი, პედაგოგიური და საზოგადოებრივი მოღვაწეობისათვის
• 1988 - საქართველოს დამსახურებული არტისტი

• მებრძოლი შავის ბედისა : პოემა : მემედ აბაშიძე-130 (ავტორი). - თბილისი, "პირველი სტამბა", 2003. - 68გვ.
• თეთრი მაგნოლია : მოთხრობები (ავტორი). - თბილისი, ნაკადული, 1980. - 121გვ.
• სახელი შენი-ძეგლია შენი! : მექანიზატორი ივანე ალექსაშვილი (ავტორი). - თბილისი, საბჭ. საქართველო, 1980. - 51გვ.
• უკანასკნელი მოსახლე : მთვარის დაბადება : მოთხრობები საშ. სასკოლო ასაკის ბავშვთათვის (ავტორი). - თბილისი, ნაკადული, 1977. - 64გვ.