ნიკო ლომჯარია

დაბადების ადგილი: ქ. ბათუმი.

დაამთავრა თბილისის სახელმწიფო უნივერსიტეტის ფიზიკა-მათემატიკის ფაკულტეტი 1931 წელს.

ჯერ კიდევ სტუდენტობის წლებში, 1930 წლიდან, ასწავლიდა პოლიტექნიკური ინსტიტუტის მოსამზადებელ ჯგუფებში; გაწევრიანდა სპორტულ საზოგადოება "შევარდენში" და მონაწილეობდა გიორგი ნიკოლაძის მიერ მოწყობილ ალპინიადებში; 1931 წლიდან მუშაობდა სამშენებლო ინსტიტუტში ასისტენტის თანამდებობაზე; 1934 წლიდან სწავლობდა მოსკოვის უნივერსიტეტის ასპირანტურაში; 1937 წელს დაბრუნდა თბილისში და ლექციებს კითხულობდა პოლიტექნიკურ ინსტიტუტში, თბილისის სახელმწიფო უნივერსიტეტსა და სხვა უმაღლეს სასწავლებლებში; 1941 გაიწვიეს სამხედრო სამსახურში. იგი ჯერ გააგზავნეს ქ. ბაქოს სამხედრო სასწავლებელში, ხოლო შემდეგ ფრონტზე - საარტილერიო ბრიგადაში; 1944 წელს გაათავისუფლეს სამხედრო სამსახურიდან და იმავე წელს მუშაობა დაიწყო საქართველოს პოლიტექნიკურ ინსტიტუტში. იყო საქართველოში პირველი ტოპოლოგი. 1945-1951წწ. მუშაობდა ბათუმის სახელმწიფო პედაგოგიურ ინსტიტუტში ფიზიკა-მათემატიკის ფაკულტეტის დეკანის თანამდებობაზე, ამასთან ერთად ხელმძღვანელობდა მის მიერ დაარსებულ მათემატიკის კათედრას; იმავე წლებში შეთავსებით გორის პედაგოგიური ინსტიტუტის კათედრის გამგე იყო; აქტიურად თანამშრომლობდა სოხუმის პედაგოგიურ ინსტიტუტთან, სადაც სახელმწიფო გამოცდების თავმჯდომარედ იწვევდნენ; 1951 წლიდან გარდაცვალებამდე მუშაობდა საქართველოს პოლიტექნიკურ ინსტიტუტში ჯერ დოცენტად, შემდეგ პროფესორის, კათედრის გამგის მოადგილის თანამდებობაზე. დიდი შრომა გასწია ქართულ ენაზე ძირითადი და დამხმარე სახელმძღვანელოების შექმნის საქმეში; სრულყოფილად ფლობდა რუსულ, ფრანგულ გერმანულ ენებს; აქვს უნიკალური შრომები ქართული თვლის სისტემის კვლევაში; უცხო ენების სრულყოფილად ცოდნა მას საშუალებას აძლევდა შედარებითი ანალიზი გაეკეთებინა ქართულ და სხვა ენებში არსებულ სისტემებზე; იგი ქართული მათემატიკური ტერმინოლოგიის ერთ-ერთი შემქმნელია; დიდი ღვაწლი მიუძღვის ქართული მათემატიკური ტერმინების დანერგვის საქმეში. პროფესორი (1963).

საკანდიდატო დისერტაციის თემა - "სრულიად სავსე სივრცე", დაიცვა 1944 წელს.

წყარო: გამოჩენილი ინჟინრები და მეცნიერები: კრებული /შემდგ.: მიტროპოლიტი ანანია ჯაფარიძე [და სხვ.]. -თბ., 2012. -გვ.99-101

• უმაღლესი სკოლის დამსახურებული მუშაკი

• უმაღლესი მათემატიკის კურსი : სახელმძღვანელო უმაღლესი ტექნიკური სასწავლებლებისათვის (თანაავტორი) // ტ. 3. - თბილისი, განათლება, 1973. - 480გვ.
• მათემატიკა : უმაღლ. სასწავლებლებში შემსვლელთათვის (თანაავტორი). - თბილისი, ცოდნა, 1964. - 632გვ.
• უმაღლესი მათემატიკის კურსი : სახელმძღვანელო უმაღლესი ტექნიკური სასწავლებლებისათვის (თანაავტორი) // ტ. 2. - თბილისი, ცოდნა, 1964. - 419გვ.
• უმაღლესი მათემატიკის კურსი : სახელმძღვანელო უმაღლესი ტექნიკური სასწავლებლებისათვის (თანაავტორი) // ტ. 1. - თბილისი, საქ. პოლიტექნ. ინ-ტის გამ-ბა, 1962. - 472გვ.
• ცნობარი ელემენტარულ მათემატიკაში : უმაღლ. სასწავლებლებში შემსვლელთათვის (თანაავტორი). - თბილისი, ცოდნა, 1958. - 320გვ.