დევი ჩხეიძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის 1952 წელს.

1956-1963წწ. - საქართველოს მეცნიერებათა აკადემიის გეოლოგიური ინსტიტუტის სწავლული მდივანი და უფროსი მეცნიერ-თანამშრომელი; 1963 წლიდან - საქართველოს პოლიტექნიკური ინსტიტუტი, უფორის მასწავლებელი, დოცენტი, პროფესორი სამთო-გეოლოგიური ფაკულტეტის ჰიდროგეოლოგიისა და საინჟინრო-გეოლოგიის კათედრაზე; 1974-1991წწ. ამავე კათედრის ხელმძღვანელი; 1976-1991წწ. - საქართველოს ტექნიკური უნივერსიტეტის პირველი პრორექტორი სასწავლო დარგში; ბოლო წლებში - კათედრის პროფესორი და კომპანია "ჯეოინჟინირინგის" მთავარი მეცნიერ-კონსულტანტი. მისი მეცნიერული, პედაგოგიური და პრაქტიკული საინჟინრო მოღვაწეობის ძირითადი სფერო იყო საინჟინრო გეოლოგია; ამ დარგში იგი 80-მდე სამეცნიერო შრომის, მათ შორის, ორი სახელმძღვანელოს და ორი მონოგრაფიის ავტორია; მონაწილეობდა მრავალ საერთაშორისო კონგრესსა და სიმპოზიუმში. უდიდესი ღვაწლი მიუძღვის ეროვნული საინჟინრო განათლებისა და მეცნიერების განვითარებაში; მისი საინჟინრო და სამეცნიერო საქმიანობა დაკავშირებული იყო როგორც საკვლევ-საძიებო, ასევე თეორიული და მეთოდური საკითხების დამუშავებასთან, რომლებიც ეხებოდა სხვადასხვა ტიპის მშენებლობისათვის საჭირო გეოლოგიურ გარემოს, ასევე სასარგებლო წიაღისეულის დამუშავების და მიწისქვეშა ნაგებობათა მშენებლობის საინჟინრო-გეოლოგიური უზრუნველყოფის პრობლემებს; მისი შრომების მნიშვნელოვანი ნაწილი გამოქვეყნებულია უცხოეთის სამეცნიერო ჟურნალებში; თანაავტორია ისეთი ფუნდამენტური გამოცემების, როგორიცაა: სსრკ-ის ჰიდროგეოლოგია, X ტომი, სსრკ-ის საინჟინრო გეოლოგია, VIII ტომი, კავკასია, ყირიმი, კარპატები; ლექსიკონი გეოლოგიასა და გეოეკოლოგიაში და სხვა; მისი უშუალო მონაწილეობით შესრულდა მთელი რიგი საინჟინრო პროექტები, რომლებსაც დიდი ეკონომიკური და საერთაშორისო მნიშვნელობა გააჩნიათ. მიღებული აქვს სახელმწიფო ჯილდოები.

წყარო: გამოჩენილი ინჟინრები და მეცნიერები: კრებული/შემდგ.: მიტროპოლიტი ანანია ჯაფარიძე [და სხვ.]. -თბ., 2012. -გვ.159-160; წიგნი ღირსებისა: ტ. 3/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.126

• 1998 - ღირსების ორდენი
  საქართველოში ტექნიკური მეცნიერების განვითარებისა და საინჟინრო კადრების აღზრდის საქმეში შეტანილი პირადი წვლილისათვის

• მეთოდური მითითებანი სადიპლომო გეგმარის შესადგენად ჰიდროგეოლოგიის და საინჟინრო გეოლოგიის სპეციალობის სტუდენტებისათვის (შემდგენელი). - თბილისი, საქ. პოლიტექ . ინ-ტის გამ-ბა, 1980. - 36გვ.
• საინჟინრო გეოლოგია : სახელმძღვ. უმაღლ. სასწ. სამშენებლო სპეც. სტუდენტებისათვის (ავტორი). - თბილისი, განათლება, 1979. - 363გვ.