ბესიკ ქუთათელაძე

დაბადების ადგილი: ქ. საჩხერე.

დაამთავრა თბილისის ფიზიკური კულტურის სახელმწიფო ინსტიტუტი 1985 წელს.

1979-1980წწ. იყო საჩხერის სპორტული სკოლის მწვრთნელი; 1982-1984წწ. საჩხერის პროფესიულ-ტექნიკური სასწავლებლის ფიზიკური აღზრდის ხელმძღვანელი; 1984 წლიდან საჩხერის სპორტული კომპლექსის დირექტორი; 1990-1991წწ. საქართველოს რესპუბლიკის პირველი მოწვევის უზენაესი საბჭოს წევრი: მაჟორიტარი, საჩხერის N67 საარჩევნო ოლქი; ხელი აქვს მოწერილი საქართველოს სახელმწიფოებრივი დამოუკიდებლობის აღდგენის აქტზე (1991 წლის 9 აპრილი); 1991 წელს ჩამოაყალიბა საჩხერეში ერთ-ერთი პირველი საჯარისო შენაერთი, რომელსაც ეწოდა "იმერეთის სადროშო", იყო ამ შენაერთის მეთაური; 1991-1992წწ. საქართველოს რესპუბლიკის თავდაცვის მინისტრის მოადგილე; აქტიურ მონაწილეობას ღებულობდა საქართველოს ერთიანობისათვის წარმოებულ ბრძოლებში (1991-1992 წწ., სამაჩაბლო); 1992 წლის 13 ივნისს ქალაქ გორში რუსეთის სამხედრო ძალებთან შეტაკების დროს ბესიკ ქუთათელაძე მძიმედ დაიჭრა და 27 ივნისს გარდაიცვალა. სპორტის ოსტატი სამბოსა და ძიუდოში, საბჭოთა კავშირის ჩემპიონი ძიუდოში. ბესიკ ქუთათელაძის სახელი მიენიჭა თავდაცვის სამინისტროს საჩხერის სამთო მომზადების სკოლას.

წყარო: საქართველოს პარლამენტის ვებგვერდი: parliament.ge; საქართველოს პარლამენტის წევრები 1990-2015 / კობა ამირხანაშვილი.- თბ.-2015.-გვ.341; უკვდავება : საქართველოს ტერიტორ. მთლიანობისათვის აფხაზეთსა და შიდა ქართლში დაღუპულ მეომართა ბიოგრაფიები. ნაწილი 1-თბ.,1996.-გვ.435-437

• საქართველოს რესპუბლიკის პირველი მოწვევის უზენაესი საბჭო, წევრი (1990-1991)
• საქართველოს რესპუბლიკის პირველი მოწვევის უზენაესი საბჭოს თავდაცვის, ეროვნული უშიშროების და მართლწესრიგის კომისია, წევრი (1990-1991)

• ვახტანგ გორგასლის I ხარისხის ორდენი