როსტომ ალავიძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი სამდინარო ნაგებობებისა და ჰიდროელექტროსადგურების მშენებლობის სპეციალობით 1972 წელს.

ინსტიტუტის დამთავრების შემდეგ მუშაობა დაიწყო საკავშირო ინსტიტუტ "ორგენერგომშენის" თბილისის ფილიალში, სამუშაოთა წარმოების პროექტების განყოფილების ინჟინრად; 1973-1975წწ. მსახურობდა საბჭოთა არმიის რიგებში, ოფიცრად, სავალდებულო სამხედრო სამსახურის დამთავრების შემდეგ მუშაობდა საკავშირო ინსტიტუტ "ორგენერგომშენის" თბილისის ფილიალში, სამუშაოთა წარმოების პროექტების განყოფილებაში უფროს ინჟინრად, ჯგუფის ხელმძღვანელად, მთავარ სპეციალისტად; 1978-1981წწ. მუშაობდა სამშენებლო ტრესტ "საქჰიდროენერგომშენის" ტექნიკური განყოფილების უფროსის მოადგილედ; 1981 წლიდან საქართველოს კომპარტიის სამდივნოს დადგენილებით გადაყვანილ იქნა ცენტრალური კომიტეტის მშენებლობისა და საქალაქო მეურნეობის ინსტრუქტორად; 1987 წლის იანვრიდან, საქართველოს კომპარტიის ცენტრალური კომიტეტის ბიუროს გადაწყვეტილებით გადაყვანილ იქნა ამავე განყოფილების გამგის მოადგილედ; 1988 წლიდან მუშაობდა საპროექტო ინსტიტუტ "თბილჰიგროპროექტის" დირექტორის მოადგილედ; 1993 წლიდან გადაყვანილ იქნა სპეცგაერთიანება "საქფეთქმრეწვი"-ს დირექტორის მოადგილედ; 1996 წლიდან მუშაობდა ს.ს. "საქქალაქმშენსახპროექტში" ტექნიკური განყოფილების უფროსად; 1999 წლიდან, როგორც ერთ-ერთი დამფუძნებელი, მუშაობდა შპს "ალიონი 99"-ში ვიცე-პრეზიდენტად, სამშენებლო სამუშაოთა წარმოების საკითხებში; 2012 წლიდან მუშაობს ს.ს. "საქფეთქმრეწვში", ჯერ სამშენებლო სამუშაოთა წარმოების მენეჯერად, ხოლო შემდეგ არჩეულ იქნა ს.ს. "საქფეთქმრეწვის" სამეთვალყურეო საბჭოს ხელმძღვანელად; 2017 წელს "საქართველოს საამფეთქებლო საქმიანობის ასოციაციის" დაფუძნების შემდეგ, არჩეულ იქნა ასოციაციის პრეზიდენტად; ხანგრძლივი შრომითი საქმიანობისა და დამსახურებისათვის მიღებული აქვს სახელმწიფო და საუწყებო ჯილდოები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ.40-41