ბადრი ბარბაქაძე

დაბადების ადგილი: სოფელი ბორითი, ხარაგაულის რაიონი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი, სამრეწველო და სამოქალაქო მშენებლობის სპეციალობით 1974 წელს.

1974-1999წწ. მუშაობა დაიწყო თბილისის ზონალურ სამეცნიერო-კვლევით და ექსპერიმენტული პროექტების ინსტიტუტში ინჟინერ-კონსტრუქტორად, შემდეგ წამყვან კონსტრუქტორად, განყოფილების მთავარ კონსტრუქტორად; 1999 წლიდან მუშაობს ასოციაცია "ატუ"-ში; ჯერ იყო პროექტის მტავარი კონსტრუქტორი, შემდეგ ასოციაციის მთავარი კონსტრუქტორი; 1974-1999წწ. უშუალო მონაწილეობა აქვს მიღებული (16-18 სართულიანი) საცხოვრებელი და საზოგადოებრივი დანიშნულების შენობების სეისმომედეგი, უნიფიცირებული, ანაკრები რკინაბეტონის, "იის-04" სერიის კარკასული ნაკეთობების დამუშავებისა და დანერგვაში; ასევე სერიების "1.020.1-1C" და "1.120.1-1C" დამუშავებასა და დანერგვაში, საბჭოთა კავშირის მასშტაბით; იყო პროექტის მთავარი კონსტრუქტორი; 1984-1999წწ. აქტიურად მონაწილეობდა "იის-04" სერიის მრავალსართულიანი კარკასული საცხოვრებელი სახლების პროექტირებაში საქართველოს მასშტაბით, ქალაქებში - თბილისში, ქუთაისში, ბორჯომში, აფხაზეთსა და აჭარაში, ასევე საბჭოთა კავშირის სხვადასხვა ქალაქებში - სოჭში, ნევინომინსკში, ორენბურგში, კემეროვოში და სხვა; მონაწილეობდა მრავალი მნიშვნელოვანი საზოგადოებრივი დანიშნულების ობიექტის პროექტირებაში. მათ შორის: საცხოვრებელი კომპლექსების დაბა ურეკში და დაბა ბაკურიანში, ქ. საჩხერის რაიონული საავადმყოფოს ახალი შენობის (2004-2012), ასევე ჯ. კახიძის სახ. მუსიკალური ცენტრის, შ. რუსთაველის სახელობისა და გრიბოედოვის სახელობის დრამატული თეატრების ქ. თბილისში, ი. ჭავჭავაძის სახელობისა და ა. წუწუნავას სახელობის დრამატული თეატრების ქ. ბათუმსა და ქ. ოზურგეთში - რეკონსტრუქციის პროექტირებაში (2004-2016); აგრეთვე სომხური დრამატული თეატრის შენობის ქ. თბილისში და ახალი დრამატული თეატრის შენობის ქ. ზუგდიდში (2017-2019), დიდი საკონცერტო დარბაზის დაბა შეკვეთილში (2012-2016) -პროექტირებაში; მონაწილეობდა და წაკითხული აქვს მოხსენებები სამეცნიერო-საკვლევ კონფერენციებზე, ქალაქებში: მოსკოვი, ტაშკენტი, ჩებოკსარი, ბაქო, ერევანი, თბილისი და სხვა; აქტიურად იყო ჩართული ზონალურ სამეცნიერო-საკვლევ ინსტიტუტ "კიევზნიეპ"-თან თანამშრომლობაში, ტიპური კარკასის სივრცული გაანგარიშების პროგრამაში; არის ათამდე გამოგონების ავტორი; ტიპური კარკასული სერია "1.120.1-1C"-ს  დამუშავებისა და დანერგვისათვის მიღებული აქვს საბჭოთა კავშირის მინისტრთა საბჭოს პრემია (1988).

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ.58-59