თამაზ ბუსკივაძე

დაბადების ადგილი: სოფელი თუზი, თერჯოლის რაიონი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი, სამრეწველო და სამოქალაქო მშენებლობის სპეციალობით 1973 წელს.

შრომითი საქმიანობა დაიწყო საქართველოს მშენებლობის სამინისტროს №1 სამშენებლო ტრესტ "ამიერკავკასმეტალურგმშენის" სისტემაში მუშად, აზოტოვანი სასუქების ქარხნის მშენებლობაზე; 1970-2006წწ. მუშაობდა თბილისის ზონალურ სამეცნიერო-კვლევით და ექსპერიმენტული პროექტირების ინსტიტუტში, ჯერ ტექნიკოსად, შემდეგ იყო ინჟინერ-კონსტრუქტორი; 1973-1974წწ. მსახურობდა საბჭოთა არმიის რიგებში, სავალდებულო სამხედრო სამსახურში; 1974 წლიდან მუშაობდა ამავე ინსტიტუტში ჯგუფის ხელმძღვანელად, შემდეგ პროექტის მთავარ კონსტრუქტორად; 1981-1985წწ. მივლინებით იმყოფებოდა ვიეტნამის სოციალისტურ რესპუბლიკაში, ინჟინერ-კონსტრუქტორად ხოაბინის ჰიდროკვანძის მშენებლობაზე; 2006 წლიდან მუშაობს შპს "თეგეტა მოტორსი"-ს სამშენებლო-საპროექტო განყოფილებაში ინჟინერ-კონსტრუქტორად; აქტიურად მინაწილეობდა საქართველოს რეგიონებში მიწისძვრის შედეგად დაზიანებული შენობა-ნაგებობების გამოკვლევასა და გამაგრება-გაძლიერების პროექტების დამუშავებაში; დაპროექტებული აქვს ქ. ხუაბინის (ვიეტნამი) ჰიდროელექტრო სადგურის საწარმოო ბაზები და ნაგებობები, შპს "თეგეტა მოტორსის" სერვის ცენტრები და დამხმარე შენობა-ნაგებობები; ავტორია ორი გამოგონების; დაჯილდოებულია ვიეტნამის რესპუბლიკის მედლით, ჰიდროკვანძის მშენებლობაზე წარმატებული შრომისათვის; მრავალწლიანი შრომითი საქმიანობისა და დამსახურებისათვის მიღებული აქვს საუწყებო ჯილდოები და საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 74