ავთანდილ გეგუჩაძე

დაბადების ადგილი: ქ. ქუთაისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი, სამრეწველო და სამოქალაქო მშენებლობის სპეციალობით 1976 წელს.

1976-1979წწ. მუშაობდა საქართველოს მშენებლობის სამინისტროს ცენტრალურ ნორმატიულ საკვლევ სადგურში ჯერ ინჟინრად, შემდეგ კი უფროს ინჟინრად; 1979-1987წწ. მუშაობდა საქართველოს მშენებლობის სამინისტროს №4 სამშენებლო ტრესტის მოპირკეთების სამმართველოს სამუშაოთა მწარმოებლად, უფროს სამუშაოთა მწარმოებლად; 1988-1992წწ. მუშაობდა საქართველოს ადგილობრივი მრეწველობის სამინისტროს სამშენებლო სამმართველოს სამშენებლო უბნის უფროსად; 1992-2002წწ. იყო სამშენებლო ფირმის - შპს "მშენებლის" მთავარი ინჟინერი; 2003 წლიდან სამუშაოდ გადადის ქ. მოსკოვში, სადაც 2009 წლამდე მუშაობდა სამშენებლო ფირმის - შპს "ვიტმა-1"-ის უფროს სამუშაოთა მწარმოებლად; აქტიურად იყო ჩართული ქ. მოსკოვის ბინათმშენებლობის სფეროში; 2010 წლიდან ბრუნდება საქართველოში და მუშაობას იწყებს სამშენებლო კომპანია - შპს "ბკ კაპიტალში"- უფროს სამუშაოთა მწარმოებლად, სადაც მუშაობდა 2019 წლამდე; 2019 წლიდან მუშაობს სამშენებლო კომპანია - შპს "ბკ კონსტრაქშენში" უფროს სამუშაოტა მწარმოებლად; მისი უშუალო მონაწილეობითა და ხელმძღვანელობით განხორციელებულია მრავალი მნიშვნელოვანი სამრეწველო, საზოგადოებრივი და კულტურულ-საგანმანათლებლო დანიშნულების ობიექტების მშენებლობა, როგორც საქართველოს სხვადასხვა რეგიონებში, ისე ქ. მოსკოვის რაიონებში; მრავალწლიანი შრომითი საქმიანობისა და დამსახურებისათვის მიღებული აქვს საუწყებო ჯილდოები და საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 82-83