ზურაბ გვიშიანი

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის ჰიდროტექნიკისა და სანტექნიკის ფაკულტეტი, სამდინარო ნაგებობებისა და ჰიდროტექნიკური მშენებლობის სპაციალობით და მიენიჭა ინჟინერ-ჰიდროტექნიკოსის კვალიფიკაცია 1985 წელს.

შრომითი საქმიანობა დაიწყო საქართველოს ღვინის წარმოების სახელმწიფო კომიტეტის სამშენებლო ტრესტის სისტემაში მშენებელ ოსტატად; 1986-1987წწ. მუშაობდა სსრკ წყალთა მეურნეობისა და მელიორაციის სამინისტროს სახელმწიფო საპროექტო ინსტიტუტ "სოიუზ გიპროვოდპროექტი"-ში ინჟინრად; 1987-1988წწ. მუშაობდა საქართველოს ჰიდროტექნიკისა და მელიორაციის სამეცნიერო-კვლევითი ინსტიტუტის უფროს ინჟინრად; 1988-1990წწ. იყო იმავე ინსტიტუტის ასპირანტი; 1991-1997წწ. მუშაობდა საქართველოს ჰიდროტექნიკისა და მელიორაციის სამეცნიერო-კვლევითი ინსტიტუტის სამთო მელიორაციის ლაბორატორიის უფროს მეცნიერ-თანამშრომლად; 1997-1998წწ. იყო საქართველოს ჰიდროტექნიკისა და მელიორაციის სამეცნიერო-კვლევითი ინსტიტუტის ბუნებრივი კატასტროფული მოვლენების კვლევის ლაბორატორიის უფროსი მეცნიერ-თანამშრომელი; ამავე პერიოდში მუშაობდა საქართველოს აგრარულ უნივერსიტეტში მიწვეულ პედაგოგად და მიენიჭა დოცენტის სამეცნიერო-პედაგოგიური სტატუსი ჰიდროტექნიკისა და მელიორაციული მშენებლობის განხრით; 1998-2004წწ. მუშაობდა საქართველოს სოფლის მეურნეობისა და სურსათის სამინისტროს სისტემაში, ჯერ მეცნიერული უზრუნველყოფისა და ბუნებათსარგებლობის დეპარტამენტის წყლის მართვის სამმართველოს უფროსის მოადგილედ; შემდეგ ამავე სამინისტროს აგროსაინჟინრო მომსახურებისა და მექანიზაციის დეპარტამენტის, ასევე სასოფლო-სამეურნეო წარმოების მომსახურების დეპარტამენტის კვლევის, დანერგვისა და კონსულტირების სამმართველოსა და სოფლის მეურნეობის განვითარების დეპარტამენტის რეგიონებთან ურთიერთობის სამმართველოს უფროსის მოადგილედ; 2004-2015წწ. მუშაობდა შპს "საერთაშორისო სამართლისა და მართვის ქართულ-ბრიტანულ უნივერსიტეტი"-ს რექტორად; 2011-2012წწ. შეთავსებით იყო საქართველოს გაერთიანებული წყალმომარაგების კომპანიის კვლევის სამმართველოს უფროსი; 2015 წლიდან არის საქართველოს ტექნიკური უნივერსიტეტის ასოცირებული პროფესორი და სამშენებლო ფაკულტეტზე მიჰყავს სალექციო და პრაქტიკული კურსები - წყალმომარაგების, წყლის ინჟინერიის, გარემოს ეკოლოგიის, წყლის რესურსების მართვის, წყლის გაწმენდის თანამედროვე "მწვანე" ტექნოლოგიების მიმართულებით; 2019 წლიდან ამავე უნივერსიტეტის სამშენებლო ფაკულტეტის დეკანია; არის 14 სამეცნიერო სტატიის, 2 გამოგონებისა და 1 მეთოდური მითითების ავტორი; სამაგისტრო და სადოქტორო ნაშრომებისა და სადოქტორო პროგრამის "წყლის ინჟინერია" - ხელმძღვანელი, ასევე საერთაშორისო გრანტის კოორდინატორი, რომლის ფარგლებშიც განხორციელდა სამშენებლო ფაკულტეტის მაგისტრანტების საწარმოო პრაქტიკა პოლონეთში, ბელოსტოკის ტექნიკურ უნივერსიტეტში; მონაწილეობა აქვს მიღებული საერთაშორისო კონფერენციებსა და ფორუმებში, სახელმწიფო და რეგიონალურ პროგრამებში; ქ. მოსკოვის სახელობის სახელმწიფო უნივერსიტეტის ნიადაგების ფიზიკისა და მელიორაციის კათედრაზე, სასწავლო პროცესში დანერგილია მის მიერ შემუშავებული სამეცნიერო კვლევების მეთოდიკა - სხვადასხვა კონსისტენციის ნიადაგ-გრუნტების მახასიათებლებზე ტემპერატურული ფაქტორის გავლენა; ისრაელში, საბერძნეთში, დიდ ბრიტანეთსა და პოლონეთში გავლილი აქვს კვალიფიკაციის ამაღლების კურსები; მუშაობს საქართველოს ტექნიკური უნივერსიტეტის სამშენებლო ფაკულტეტის დეკანის თანამდებობაზე.

საკანდიდატო დისერტაციის თემა - "ღვარცოფული ნაკადების ფიზიკა-მექანიკური მაჩვენებლების გამოკვლევა", მიენიჭა ტექნიკურ მეცნიერებათა კანდიდატის ხარისხი 1994 წელს.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 91-93

• საქართველოს საინჟინრო აკადემია, წევრ-კორესპონდენტი (2019-)

• 2023 - საქართველოს მეცნიერებათა ეროვნული აკადემიის საპატიო სიგელი (იუნესკოს მიერ დაწესებულ მეცნიერების მსოფლიო დღესთან დაკავშირებით)
  ტექნიკის დარგში სამეცნიერო მიღწევებისთვის