ალექსანდრე გოგიშვილი

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი და მიენიჭა ინჟინერ-მშენებლის კვალიფიკაცია 1974 წელს.

ინსტიტუტის დამთავრების შემდეგ მუშაობა დაიწყო თბილისის ზონალურ სამეცნიერო-კვლევით და ექსპერიმენტული პროექტების ინსტიტუტის ("თბილზნიეპის") №2 არქიტექტურულ-საპროექტო სახელოსნოში ინჟინერ-კონსტრუქტორის თანამდებობაზე; 1976 წელს გახდა კონსტრუქტორთა საპროექტო ჯგუფის ხელმძღვანელი; მისი უშუალო მონაწილეობით დამუშავებულ იქნა ტიპური პროექტები სკოლების, საბავშვო ბაღებისა და საცხოვრებელი სახლების მშენებლობისათვის; ასევე მონაწილეობდა ქ. სოხუმის საზღვაო პორტის ვაგზლის შენობის პროექტირებაში; 1981-1985წწ. მივლინებით იმყოფებოდა ვიეტნამის სოციალისტურ რესპუბლიკაში საბჭოთა სპეციალისტების ჯგუფის შემადგენლობაში; მიიღო მონაწილეობა "ხოაბინის" ჰიდროელექტროსადგურის მუშაკთათვის საცხოვრებელი დაბის პროექტირებასა და მშენებლობაში; ასევე, მონაწილეობდა ჰიდროელექტროსადგურ "ჩიანი"-ს საპროექტო ჯგუფის მუშაობაში; ვიეტნამის რესპუბლიკაში მისი შრომითი საქმიანობა აღინიშნა ვიეტნამის მთავრობის ორდენით და საპატიო სიგელებით; 1985 წლიდან კვლავ თბილისის ზონალურ სამეცნიერო-კვლევით და ექსპერიმენტული პროექტების ინსტიტუტში ("თბილზნიეპში") მუშაობს არქიტექტურულ-საპროექტო სახელოსნოს მთავარ კონსტრუქტორად; მისი მონაწილეობით დაპროექტებულ იქნა სკოლა ქ. მაგასში (ინგუშეთის რესპუბლიკა) და პიონერთა ბანაკი დაბა ვარდანაში (ქ. სოჭი); აქტიურად მონაწილეობდა სერია "იის-04"-ის კონსტრუქციების გამოყენებით სკოლებისა და საბავშვო ბაღების ტიპური პროექტების, ასევე საცხოვრებელი სახლების პროექტების დამუშავებაში; მონაწილეობა მიიღო 1991 წლის მიწისძვრით დაზარალებული შიდა ქართლისა და იმერეთის რაიონებში შენობა-ნაგებობების, ასევე საცხოვრებელი სახლების აღდგენა-გამაგრების სამუშაოებში; 1994-1997წწ. მონაწილეობდა მთავარი კონსტრუქტორის რანგში, სერია "იის-04" და სერია "1.020.1-2C" კონსტრუქციების გამოყენებით საცხოვრებელი სახლების პროექტირებაში, ქ. კემეროვოში (ტიუმენის ოლქი) და საცხოვრებელი კოტეჯების, კრასნოდარის მხარეში; 2004-2006წწ. მუშაობდა "ქართუ ჯგუფში"; მონაწილეობდა საჩხერის ბატალიონის საცხოვრებელი სახლისა და სპორტული ნაგებობების კომპლექსის პროექტირებაში, ასევე დ. ბაკურიანში კინოთეატრ "დიდველის" კონსტრუქციული ნაწილის პროექტირებაში; 2006-2009წწ. შპს "საქპროექტარქიტექტურა"-ში მთავარ კონსტრუქტორად; მისი მონაწილეობით განხორციელდა ტუბერკულოზის საავადმყოფოს შენობის სრული რეკონსტრუქცია ქ. თბილისში, პოლიციის შენობის პროექტირება ავჭალაში, სკოლების დაპროექტება მთიან აჭარაში და ნაპირსამაგრი სამუშაოების პროექტირება-მშენებლობა; 2009 წლიდან შპს "უნივერსალინტრალოჯისტიკ"-ში და ხელმძღვანელობს საპროექტო-სამშენებლო სამუშაოების წარმოებას ლოჯისტიკის სფეროში; მრავალწლიანი შრომითი საქმიანობისათვისა და დამსახურებისათვის მიღებუი აქვს სხვადასხვა საუწყებო ჯილდოები და საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 97-98