ოთარ გოცირიძე

დაბადების ადგილი: ქ. ბორჯომი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი და სახელმწიფო კომისიის გადაწყვეტილებით მიენიჭა ინჟინერ-მშენებლის კვალიფილაცია 1960 წელს.

1960-1964წწ. მუშაობდა ქ. თბილისის ერთ-ერთ სამშენებლო ორგანიზაციაში მშენებელ ოსტატად, სამუშაოთა მწარმოებლად; 1965 წლიდან მუშაობდა სახელმწიფო საპროექტო ინსტიტუტ "საქსახსოფელპროექტი"-ს სახარჯთაღრიცხვო განყოფილებაში ინჟინრად; 1970 წლიდან მუშაობდა საქართველოს მშენებლობის სამინისტროს №13 სამშენებლო ტრესტის 6 სამშენებლო სამმართველოში, ჯერ სამუშაოთა მწარმოებლად, შემდეგ უფროს სამუშაოთა მწარმოებლად; 1975 წლიდან იყო იმავე სამშენებლო სამმართველოს მთავარი ინჟინერი; 1986 წელს დაინიშნა რესპუბლიკური მნიშვნელობის კურორტ ბაკურიანის საკურორტო საბჭოს დირექტორად; 1992 წელს გადაყვანილ იქნა ბორჯომის რაიონის გამგებლად; 1996 წელს კვლავ დაინიშნა კურორტ ბაკურიანის საკურორტო საბჭოს დირექტორად; აქტიურად მონაწილეობდა დ. ბაკურიანის სამთო-სათხილამურო კომპლექს "დიდველის" მშენებლობასა და შექმნაში; 2000 წლიდან ამავე კომპლექსის პირველი დირექტორი იყო; ეწევა კერძო სამეწარმეო საქმიანობას; არის საკუთარი კეთილმოწყობილი საოჯახო სასტუმრო კომპლექსის დირექტორი; საქართველოს მშენებლობის სამინისტროს №13 სამშენებლო ტრესტში მუშაობის პერიოდში, მისი მონაწილეობითა და ხელმძღვანელობით აშენებულ იქნა არაერთი კულტურულ-საგანმანათლებლო და საზოგადოებრივი დანიშნულების მნიშვნელოვანი ობიექტი, მათ შორის: რამდენიმე საბავშვო ბაღი და სკოლა ქ. თბილისში, საქართველოს კომპარტიის ცენტრალური კომიტეტის ადმინისტრაციული შენობა (დღევანდელი საქართველოს მთავრობის კანცელარიის შენობა), რიტუალების სასახლე, ასევე ჯანმრთელობის დაცვის სფეროს ობიექტები ქ. თბილისსი და სხვა; ახალგაზრდობის პერიოდში, პროფესიური საქმიანობის პარალელურად, აქტიურად იყო ჩართული სამთო-სათხილამურო და წყალ-სათხილამურო სპორტის სახეობებში; იყო საქართველოს ჩემპიონი; მონაწილეობდა შეჯიბრებებში საბჭოთა კავშირის მასშტაბით - ქ. მოსკოვში, ქ. მინსკში, ქ. რიგაში, ხოლო ქ. კიევსა და ქ. ნიკოლაევში გამართულ შეჯიბრებებზე ჩემპიონობა მოიპოვა; იყო საქართველოს ნაკრების მწვრთნელი სამთო-სათხილამურო სპორტში; რეგულარულად მონაწილეობს ვეტერან მოთხილამურეთა შეჯიბრებებში; გამოცემული აქვს წიგნი კურორტ ბაკურიანისა და ბაკურიანელი სპორტსმენების შესახებ; მრავალწლიანი პროფესიული შრომითი საქმიანობისა და დამსახურებისათვის მიღებული აქვს საუწყებო ჯილდოები და საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 103-104