ნათელა კაპანაძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი, სამრეწველო და სამოქალაქო მშენებლობის სპეციალობით 1961 წელს.

უმაღლესი სასწავლებლის დამთავრების შემდეგ მუშაობა დაიწყო სახელმწიფო საპროექტო ინსტიტუტ "საქქალაქმშენსახპროექტში", არქიტექტურული სახელოსნოს ინჟინერ-კონსტრუქტორად; 1964 წელს გადაყვანილ იქნა თბილისის ზონალურ სამეცნიერო კვლევით და ექსპერიმენტული პროექტირების ინსტიტუტში ("თბილზნიეპი"), სექტორის ხელმძღვანელად კარკასულ შენობათა განყოფილებაში; 1974-2006წწ. იყო ამავე ინსტიტუტის ინდუსტრიული სამშენებლო კონსტრუქციების განყოფილების მთავარი სპეციალისტი; 2006-2010წწ. ინსტიტუტის მთავარი სპეციალისტი; თანაავტორია ინსტიტუტში დამუშავებული მრავალი ტიპური, ინდივიდუალური და ექსპერიმენტული პროექტის; განსაკუთრებით აღსანიშნავია მისი წვლილი სეისმომედეგი კონსტრუქციების დამუშავებაში და მათი მშენებლობაში დანერგვის განხრით; ავტორთა ჯგუფთან ერთად მონაწილეობდა მათ მიერ დამუშავებული სერიების კონსტრუქციების ათვისებასა და დანერგვაში, ინდუსტრიულ ბაზებსა და მშენებლობაში; მონაწილეობდა საკავშირო და საერთაშორისო სემინარებისა და კონფერენციების მუშაობაში - ქალაქებში: თბილისში, მოსკოვში, ტაშკენტში, დუშანბეში, ირკუტსკში, უჟგოროდში და ბელგრადში; მონაწილეობდა ქ. სპიტაკში მიწისძვრით დაზიანებული შენობების პროექტების ექსპერტიზაში; საჩხერის რაიონში და ქ. თბილისში 2002 წლის 25 აპრილს მიწისძვრით დაზიანებული შენობა-ნაგებობების შემოწმებაში, დასკვნა-რეკომენდაციების შედგენაში და აღდგენა-გაძლიერების პროექტების დამუშავებაში; არის სსრკ მინისტრთა საბჭოს 1982 წლის პრემიის ლაურეატი; მიღებული აქვს სსრკ სახალხო მეურნეობის მიღწევათა გამოფენის "ვერცხლის" მედალი, საქართველოს მინისტრთა საბჭოს 1980 წლის 26 მაისის განკარგულებით, მიენიჭა პირველი პრემია; მიღებული აქვს საქართველოს სახალხო მეურნეობის მიღწევათა გამოფენის მეორე ხარისხის "საპატიო სიგელი" და სხვა მრავალი საპატიო სიგელები; არის ორი გამოგონების, ტექნიკური საინფორმაციო მოხსენებებისა და სტატიების ავტორი.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 141-142

• 1981 - საპატიო ნიშნის ორდენი