გურამ კლიმიაშვილი

 დაბადების ადგილი: ქ. გორი.

დაამთავრა ქ. ოდესის ჰიდროტექნიკური ინსტიტუტის სამრეწველო და სამოქალაქო მშენებლობის ფაკულტეტი და მიენიჭა ინჟინერ-მშენებლის კვალიფიკაცია 1954 წელს.

1954-1956წწ. მუშაობდა სსრკ ენერგეტიკისა და ელექტროფიკაციის სამინისტროს დაქვემდებარებაში არსებული ორდენოსანი საწარმოო-სამშენებლო ორგანიზაცია "დნეპრომშენი"-ს სისტემაში, კახოვკის ჰიდროელექტროსადგურის მშენებლობაზე მშენებელ ოსტატად, სამუშაოთა მწარმოებლად, შემდეგ დნეპროდერჟინსკის ჰიდროელექტროსადგურის მშენებლობაზე უფროს სამუშაოთა მწარმოებლად; 1957 წელს გადაყვანილ იქნა ქ. ოდესაში სამშენებლო ტრესტ "უკრმრეწვმშენის" სისტემაში სამუშაოთა მწარმოებლად; 1959 წელს დაბრუნდა საქართველოში და მუშაობა დაიწყო საქართველოს მშენებლობის სამინისტროს №9 სამშენებლო ტრესტში უფროს სამუშაოთა მწარმოებლად; შემდეგ იყო ამავე ტრესტის სამშენებლო სამმართველოს მთავარი ინჟინერი, ტრესტის მმართველის მოადგილე; 1966 წელს გადაყვანილ იქნა გორის საქალაქო საბჭოს აღმასკომის კომუნალური მეურნეობის განყოფილების გამგედ, შემდეგ კი აღმასკომის თავმჯდომარის მოადგილედ; 1971-1974წწ. მუშაობდა საბჭოთა კავშირის მინისტრთა საბჭოსთან არსებული სახელმწიფო რეზერვების მთავარი სამმართველოს მშენებარე კომბინატ "იუჟნი"-ს დირექტორად; შემდეგ კომბინატ "ელბრუსის" დირექტორად; 1975 წელს დაინიშნა საქართველოს მინისტრთა საბჭოს კაპიტალური მშენებლობის მთავარი სამმართველოს უფროსის მოადგილედ, სადაც კურირებდა სამრეწველო და საბინაო დანიშნულების ობიექტების მშენებლობას; 1976-1991წწ. მუშაობდა საქართველოს მინისტრთა საბჭოს მომარაგების სახელმწიფო კომიტეტის თავმჯდომარის მოადგილედ, შემდეგ საქართველოს ეკონომიკის მინისტრის მოადგილედ; 1991 წელს დამოუკიდებელი საქართველოს მთავრობის დადგენილებით დაინიშნა სსრკ მინისტრთა საბჭოსთან არსებული "სახელმწიფო მატერიალურ-ტექნიკური უზრუნველყოფის კომისიის" წევრად; 1994-1999წწ. იყო სამშენებლო გაერთიანება "მთავარმოსკოვმშენი"-ს სამშენებლო აქციონერული საზოგადოება "ტბმ" ("თბილისი-მოსკოვის") დირექტორის მოადგილე; მისი უშუალო მონაწილეობითა და ხელმძღვანელობით განხორციელდა მრავალი მნიშვნელოვანი ობიექტების მშენებლობა, მათ შორის: ქ. გორის ბამბეული ქსოვილების კომბინატის, საკონსერვო ქარხნის, რკინაბეტონის კომბინატის, ბინათმშენებლობის სფეროს, ქ. გორის ცენტრალური ნაწილის რეკონსტრუქცია, ისტორიული ნაგებობების აღდგენა და სხვა; საქართველოს მინისტრთა საბჭოს მომარაგების სახელმწიფო კომიტეტში მუშაობის პერიოდში ხელმძღვანელობდა მშენებლობის, სამშენებლო ინდუსტრიისა და კომუნალური მეურნეობის სფეროების მატერიალურ-ტექნიკური უზრუნველყოფის საკითხებს; აქტიურად მონაწილეობდა სტიქიური მოვლენების შედეგად მიყენებული ზიანის სალიკვიდაციო სამუშაოების შესრულებაში; მიღებული აქვს სხვადასხვა სახელმწიფო ჯილდოები და საუწყებო საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 159-160

• საქართველოს ბიზნესის მეცნიერებათა აკადემია, ნამდვილი წავრი, აკადემიკოსი

• საქართველოს დამსახურებული ინჟინერი