თეიმურაზ მეგრელაძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი სამრეწველო და სამოქალაქო მშენებლობის სპეციალობით და მიენიჭა ინჟინერ-მშენებლის კვალიფიკაცია 1960 წელს.

1960-1977წწ. მუშაობდა თბილისის საქალაქო საბჭოს აღმასკომის დაქვემდებარებაში არსებული სახელმწიფო საპროექტო ინსტიტუტ "თბილქალაქპროექტში" ინჟინრად, შემდეგ იყო საქალაქო საბჭოს აღმასკომის საბინაო სამმართველოს სპეციალიზებული სარემონტო-სამშენებლო ტრესტის №5 სამმართველოს სამუშაოთა მწარმოებელი, საწარმოო-ტექნიკური განყოფილების უფროსი, სამმართველოს მთავარი ინჟინერი და ამავე სამმართველოს უფროსი; 1978 წელს დაინიშნა თბილისის საქალაქო საბჭოს აღმასკომის საბინაო სამმართველოს მთავარ ინჟინრად, სამმართველოს უფროსად; 1988 წელს ის გადაყავთ თბილისის საქალაქო საბჭოს აღმასკომის კომუნალური სამსახურების გაერთიანების უფროსის პირველ მოადგილედ; მისი უშუალო მონაწილეობითა და ხელმძღვანელობით განხორციელდა მნიშვნელოვანი ღონისძიებები ქ. თბილისის საბინაო მოვლა-პატრონობის გაუმჯობესების მიზნით; მისი მუშაობის პერიოდში მოხდა ქალაქის კომუნალური საცხოვრებელი სახლებისა და შენობა-ნაგებობების სრული ტექნიკური ინვენტარიზაცია, შეიქმნა ძველი შენობა-ნაგებობების ავარიულობის შემსწავლელი და დამდგენი კომისია; მისი აქტიური ჩართულობით, საპროექტო ინსტიტუტების - "თბილქალაქპროექტი", "თბილზნიეპი" და "ლენგორპროექტი"-ს მონაწილეობით დამუშავებულ იქნა მსხვილპანელოვანი და მსხვილბლოკიანი საცხოვრებელი სახლების საკედლე ანაკრები ელემენტების შეპირაპირების ადგილებში სინესტის სალიკვიდაციო სამუშაოების წარმოების ტექნოლოგია; მრავალწლიანი შრომითი საქმიანობისა და დამსახურებისათვის მიღებული ჰქონდა საუწყებო ჯილდოები და საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 189-190