გიორგი მეზურნიშვილი

დაამთავრა საქართველოს პოლიტექნიკური ინსტიტუტის ენერგეტის ფაკულტეტი და მიენიჭა ინჟინერ-ენერგეტიკოსის კვალიფიკაცია 1960 წელს.

1960-1964წწ. მუშაობდა სახელმწიფო საპროექტო ინსტიტუტ "საქგიპროშახტში" ინჟინრად; 1964-1987წწ. თბილისის ზონალურ სამეცნიერო-კვლევით, ტიპური და ექსპერიმენტული პროექტირების ინსტიტუტში ("თბილზნიეპი") ჯგუფის ხელმძღვანელად, განყოფილების უფროსად, მთავარ სპეციალისტად, ინსტიტუტის მთავარი ინჟინრის მოადგილედ; 1988-1996წწ. მუშაობდა საქართველოს განათლების სამინისტროს საპროექტო ორგანიზაციაში ("საქგანპროექტი") მთავარ ინჟინრად, დირექტორად; 1996-2005წწ. აღნიშნული საპროექტო ორგანიზაციის რეორგანიზაციის შემდეგ იყო მისი სამართალმემკვიდრე შპს "მარიამის" მთავარი ინჟინერი; 2005-2010წწ. მუშაობდა ქ. თბილისის ეკონომიკურ ურთიერთობათა სახელმწიფო უნივერსიტეტის ფინანსური და მატერიალური რესურსების მართვის სამსახურის უფროსად; 2010 წლიდან თბილისის ივ. ჯავახიშვილის სახელობის სახელმწიფო უნივერსიტეტის საფინანსო დეპარტამენტის კონსულტანტია; 1975-1978წწ. მივლინებით იმყოფებოდა ირანის ისლამურ რესპუბლიკაში სახლმშენებლობის საპროექტო ორგანიზაციის კონსულტანტად; მისი ავტორობით, მონაწილეობითა და ხელმძღვანელობით დამუშავებულია მთელი რიგი სამოქალაქო და სხვა საზოგადოებრივი დანიშნულების ობიექტების პროექტების ელექტროტექნიკური ნაწილი. მათ შორის: თბილისის ზოოვეტერინარული ინსტიტუტის, პროფკავშირების სასახლის, ოტოლარინგოლოგიური კლინიკა-საავადმყოფოს, საავტომობილო გზების სამინისტროს ადმინისტრაციული შენობის, ტურისტული ბაზების ყაზბეგსა და ფასანაურში, საქართველოს წარმომადგენლობის (შემდეგ საელჩოს) სასტუმროს ქ. მოსკოვში, დრამატული თეატრისა და სასტუმროს ქ. მახაჩყალაში, კულტურის სასახლის ქ. ორენბურგში, საცხოვრებელი კომპლექსების ქერმანში და ქარმანშახში (ირანი), ბოქსიტების საბადოს სამმართველოს ადმინისტრაციული შენობის ქ. კონაკრიში (გვინეის რესპუბლიკა). სკოლებისა და საბავშვო ბაღების საქართველოს რეგიონებში და სხვა; მრავალწლიანი შრომითი საქმიანობისა და დამსახურებისათვის მიღებული აქვს საუწყებო ჯილდოები და საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 190-191

• საქართველოს ეროვნულ და სოციალურ ურთიერთობათა აკადემია, აკადემიკოსი