მერაბ მერაბიშვილი

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი, სამშენებლო ნაკეთობებისა და კონსტრუქციების წარმოების ტექნოლოგიის სპეციალობით 1977 წელს.

1977-1984წწ. მუშაობდა საქართველოს მშენებლობის სამინისტროს ცენტრალურ ნორმატიულ-საკვლევ სადგურში უფროს ინჟინრად; 1984-1986წწ. იყო ამავე სამინისტროს №3 სამშენებლო ტრესტ "თბილრევმშენი"-ს №2 სამშენებლო სამმართველოს სამუშაოთა მწარმოებელი; 1986-1989წწ. მუშაობდა საქართველოს სოფლის მეურნეობის სამინისტროს №4 სამშენებლო-სარემონტო ტრესტის №2 მოძრავ-მექანიზებული კოლონის მთავარ ინჟინრად; 1989-2000წწ. მუშაობდა რუსეთის ფედერაციის, უზბეკეთისა და აზერბაიჯანის რესპუბლიკების სხვადასხვა სამშენებლო ორგანიზაციებში; 2000-2002წწ. იყო სამშენებლო ფირმა "ინტექსის" მთავარი ინჟინერი; 2002 წლიდან მუშაობს შპს "მერთა"-ს გენერალურ დირექტორად; უშუალოდ მონაწილეობდა და ხელმძღვანელობდა საქართველოს მასშტაბით არაერთი სამრეწველო, სოფლის მეურნეობისა და ინფრასტრუქტურული დანიშნულების მნიშვნელოვანი ობიექტების მშენებლობას; აქტიურად იყო ჩართული სომხეთში მომხდარი მიწისძვრის შედეგად დაზიანებული საცხოვრებელი სახლებისა და სხვადასხვა შენობა-ნაგებობების აღდგენითი სამუშაოების შესრულებაში; მრავალწლიანი შრომითი საქმიანობისა და დამსახურებისათვის მიღებული აქვს საუწყებო ჯილდოები და საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 193