მაქსიმე ქალდანი

დაბადების ადგილი: სოფელი თავრალი, მესტიის რაიონი.

დაამთავრა თბილისის პედაგოგიური სასწავლებელი 1932 წელს; თბილისის სახელმწიფო უნივერსიტეტის ფილოლოგიის ფაკულტეტი - 1939 წელს.

1932-1934წწ. მუშაობდა მასწავლებლად სოფელ ბაკურციხის დაწყებით სკოლაში; 1939-1948წწ. მუშაობდა ზემო სვანეთის სკოლებში; 1948 წელს მიიღეს საქართველოს სსრ მეცნიერებათა აკადემიის ენათმეცნიერების ინსტიტუტის ქართველურ ენათა განყოფილების უმცროს მეცნიერ-თანამშრომლად; 1954 წელს დაიცვა დისერტაცია ფილოლოგიის მეცნიერებათა კანდიდატის სამეცნიერო ხარისხის მოსაპოვებლად და 1956 წელს აირჩიეს უფროს მეცნიერ-თანამშრომლად. 1969 წელს მოიპოვა ფილოლოგიის მეცნიერებათა დოქტორის სამეცნიერო ხარისხი. მისი მეცნიერული კვლევის სფერო მოიცავდა ქართველური ენების ისტორიულ-შედარებით შესწავლას, განსაკუთრებით კი სვანურის ფონეტიკური სისტემის, გრამატიკული სტრუქტურის, ლექსიკისა და ტოპონიმიკის საკითხებს. ამ დარგში კითხულობდა ლექციებს თბილისის სახელმწიფო უნივერსიტეტში, როგორც ძველი ქართული ქართული ენის პროფესორი. დაბეჭდა 40-მდე გამოკვლევა, აქედან ერთი მონოგრაფია "სვანური ენის ფონეტიკა, უმლაუტის სისტემა სვანურში", უმაღლესი სასწავლებლების სახელმძღვანელო (ა. შანიძესთან და ზ. ჭუმბურიძესთან თანაავტორობით); აქტიური მონაწილეობა მიიღო ა. შანიძისა და ვ. თოფურიას მიერ დაარსებული სერიის – სვანური ტექსტების შეკრებისა და გამოცემის საქმეში: გამოიცა ამ სერიის სამი ტომი (ბალსქვემოური, ლაშხური და ლენტეხური კილოების მასალები 1967-1979წწ.). მან გარკვეული წვლილი შეიტანა აკად. ვ. თოფურიას მეცნიერული მემკვიდრეობის შესწავლაში: გამოსცა ა. დავითიანის მიერ შეკრებილი სვანური ანდაზები, რედაქცია გაუკეთა რამდენიმე ისტორიულ- ფილოლოგიური ხასიათის გამოკვლევას; იყო ენათმეცნიერების ინსტიტუტის და თბილისის სახელმწიფო უნივერსიტეტის სამეცნიერო ხარისხების მიმნიჭებელი სპეციალიზებული საბჭოს წევრი. ქართველოლოგი, საქართველოს მთიანეთის ეთნოგრაფიული ყოფის, ფოლკლორის მკვლევარი. ფილოლოგიის მეცნიერებათა დოქტორი (1969), პროფესორი.

წყარო: ქართული ენა: ენციკლოპედია. - თბ. 2008. - გვ.493-494; ენათმეცნიერების ინსტიტუტი: ice.ge;  სვანეთი და სვანები / ირაკლი დვალი, გივი ქურდიანი.-თბ., 2014.-გვ.370

• სვანური ლექსიკონი (თანაავტორი). - თბილისი, ქართული ენა, 2000. - 908გვ.. - ISBN: 9992882506
• სვანური პროზაული ტექსტები (შემდგენელი) // [ტ.] 4, ლაშხური კილო = Лашхский диалект. - თბილისი, მეცნიერება, 1979. - 293გვ.
• სვანური ენის ქრესტომათია (რედაქტორი). - თბილისი, თბილ. უნ-ტის გამ-ბა და სტ., 1978. - 368გვ.
• სვანური ანდაზები (რედაქტორი). - თბილისი, მეცნიერება, 1973. - 236გვ.
• სვანური ენის ფონეტიკა (ავტორი) // ნაწ. 1, უმლაუტის სისტემა სვანურში. - თბილისი, მეცნიერება, 1969. - 225გვ.