ვაჟა პეტრიაშვილი

დაბადების ადგილი: ქ. თბილისი.

დაამთავრა თბილისის სახელმწიფო უნივერსიტეტის საინჟინრო-ეკონომიკური ფაკულტეტი მშენებლობის ეკონომიკისა და ორგანიზაციის სპეციელობით; საქართველოს პოლიტექნიკური ინსტიტუტის სამშენებლო ფაკულტეტი სამრეწველო და სამოქალაქო მშენებლობის სპეციალობით 1987 წელს.

1977-1981წწ. მუშაობდა საქართველოს მშენებლობის სამინისტროს №10 სამშენებლო ტრესტ "მაღლივმშენი"-ს №3 სამშენებლო სამმართველოს ინჟინერ-ეკონომისტად, საწარმოო-ტექნიკური განყოფილების ინჟინრად; 1981-1983წწ. იყო საქართველოს პროფსაბჭოს კურორტების მართვის რესპუბლიკური საბჭოს კაპიტალური მშენებლობის სამმართველოს ტექნიკური განყოფილების გამგე; 1981-1985წწ. მუშაობდა საპროექტო ინსტიტუტ "ტურისტპროექტის" პროექტის მთავარ ინჟინრად, პროექტის მთავარი არქიტექტორებისა და მთავარი ინჟინრების ბიუროს უფროსად; 1985-1991წწ. იყო საქართველოს ტურიზმის რესპუბლიკური საბჭოს კაპიტალური მშენებლობის განყოფილების გამგე, შემდეგ კი კაპიტალური მშენებლობისა და მომარაგების განყოფილების გამგე; 1991-2007წწ. მუშაობდა სამხატვრო დიზაინერული საწარმო "ტურისტის", მისი რეორგანიზაციის შემდეგ, შპს "არქიტექტურულ-დიზაინერული ფირმა - ადფ"-ს მთავარ ინჟინრად; 2001-2007წწ. შთავსებით იყო შპს "სპეციალური დიზაინი და არქიტექტურა"-ს ("სდა") მთავარი ინჟინერი; 2007 წლიდან შპს "ჩვენი საქმე"-ს ჯერ მთავარი ინჟინერი იყო, შემდეგ კი დირექტორია; მისი მონაწილეობით დამუშავებულ იქნა მრავალი ტურისტული მომსახურების სფეროს მნიშვნელოვანი ობიექტების მშენებლობის პროექტები. კერზოდ, ბათუმის, გუდაუთის, ოჩამჩირის, მახაჩყალისა და ტაგანროგის ტურისტული სასტუმროების მაღლივი შენობები; ასევე მისი მონაწილეობით განხორციელდა თელავის, ლაგოდეხის, "თბილისის ზღვის" (ქ. თბილისში), მცხეთის, ფასანაურის, ქუთაისის, ბაზალეთის, ვარძიის, ზონკარის, ახალი ათონისა და ტამიშის ტურისტული სასტუმროებისა და ტურისტული ბაზების შენობა-ნაგებობების რეკონსტრუქცია; აგრეთვე სარფის საბაჟოსა და თბილისის მოსწავლე-ახალგაზრდობის სასახლის რეკონსტრუქცია და კაპიტალური რემონტი, "ბაქო-თბილისი-ყარსის" რკინიგზის ხაზის ინფრასტრუქტურული ობიექტების მშენებლობა - რუსთავში, წალკაში, ბაკურიანში და ახალციხეში; "ზუგდიდი-ხაიშის" საავტომობილო გზის გვირაბის, "ენგურჰესის", "ჟინვალჰესის", "მტკვარჰესისა" და "დარიალჰესის" წყალგამტარი გვირაბების ჰიდროსაიზოლაციო სამუშაოები; მრავალწლიანი შრომითი საქმიანობისა და დამსახურებისათვის მიღებული აქვს საუწყებო ჯილდოები და საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 219-220