ანტონ ზუბალაშვილი

დაბადების ადგილი: ქ. გორი.

ანტონ დავითის ძე ზუბალაშვილი იყო ერთ-ერთი პირველი საქართველოში, ვინც დაიწყო სოფლის მეურნეობის გადაყვანა კაპიტალისტურ რელსებზე, გონიერი და ალღოიანი მეურნე კარგად აბინავებდა საკუთარი მამულებიდან მოწეულ ხილის მოსავალს, გარდა ამისა, ნაწილს ყიდულობდა ადგილობრივი გლეხებისგანაც, ახარისხებდა და აქცევდა სასაქონლო პროდუქციად, გაჰქონდა გასასყიდად, მეტწილად რუსეთში. ანტონი, თავისი საქმიანობით (სოფლის პროდუქტების გეგმაზომიერი გამოყენება-განაწილებით) ნამდვილად იყო მისაბაძი მაგალითი ქართლელი გლეხებისათვის, რომლებიც თავიანთი კერძო მეურნეობის განვითარება-გაძლიერების თვალსაზრისით მისგან ბევრ საინტერესო და სასარგებლო ცოდნასა და ჩვევებს იძენდნენ. ანტონმა ცოლად შეირთო საქართველოში კარგად ცნობილი თავადის ალექსანდრე ჩიქოვანის ასული ეკატერინე, ღირსეული პიროვნების - გიორგი ჩიქოვანის ღვიძლი და. ანტონ ზუბალაშვილი გორში ცხოვრობდა და კომერციას ეწეოდა ძირითადად სოფლის მეურნეობის პროდუქტებით, მაგრამ მან მალე მოიპოვა მთელ ქართლში გონიერი კაცისა და გამჭრიახი ვაჭრის სახელი. რამდენადაც სიკეთის ქმნა ზუბალაშვილთა საგვარეულო ტრადიცია და დამახასიათებელი თვისება იყო, ამდენად არც ანტონი იყო გამონაკლისი ქველმოქმედებაში. იგი ეხმარებოდა ხელმოკლე და გაჭირვებულ ადამიანებს, მოსამსახურეებსაც აძლევდა დამატებით ფინანსებს შვილების კარგად აღსაზრდელად.

წყარო: ზუბალაშვილები ეროვნული მრეწველობისა და მეცენატობის სათავეებთან / ჟუჟუნა ფეიქრიშვილი.-თბ., 2011.-გვ.172-174 (dspace.nplg.gov.ge)