ჯემალ ახალაია

დაბადების ადგილი: ქ. ზუგდიდი.

დაამთავრა საქართველოს პოლიტექნიკური ინსტიტუტის ენერგეტიკის ფაკულტეტი 1980 წელს.

შრომითი საქმიანობა დაიწყო საქართველოს საპროექტო-საძიებო ინსტიტუტ "ჰიდროპროექტში" ინჟინრად, შემდეგ უფროს ინჟინრად, ჯგუფის ხელმძღვანელად. აქტიურ მონაწილეობას იღებდა ჟინვალჰესის და ხუდონჰესის მუშა პროექტების, ნამახვანის, გონეთისა და ტვიშისჰესების ტექნიკური პროექტების, ენგურჰესის, ლაჯანურჰესის, ტყიბულჰესის, რიონჰესის, ხრამჰესი 2-ის და ზაჰესის რეკონსტრუქციის პროექტების შემუშავებაში; 1992-1996წწ. მუშაობდა კომპანია "საქენერგოს" საგარეო ურთიერთობათა განყოფილების უფროსად; 1996-1997წწ. კომპანია "საქენერგოგენერაციის" სარეაბილიტაციო პროექტების აღმასრულებელ მენეჯერად. აქტიურად თანამშრომლობდა საერთაშორისო ორგანიზაციებთან, საფინანსო ინსტიტუტებთან, ბანკებთან, საინვესტიციო პროექტების მომზადების და ელექტროენერგეტიკული სექტორის რეკონსტრუქციის საკითხებზე. 1997-2002წწ. შპს "სათბობ-ენერგეტიკული პროექტების მომამზადებელი და აღმასრულებელი სააგენტოს" დირექტორის მოადგილეა. ამავდროულად არის გერმანიის საკრედიტო ბანკ KFW-თან საქართველოს ენერგო სექტორში ფინანსური თანამშრომლობის სარეაბილიტაციო პროგრამების კოორდინატორი; 2002-2007წწ. სსიპ "ელექტროენერგიის ბაზრის მხარდამჭერი პროექტის მომსახურე ორგანიზაციის" დირექტორის მოადგილე/კომპანენტების მენეჯერი. მონაწილეობს აღრიცხვის თანამედროვე სისტემების დანერგვის და გადაცემის სისტემის რეაბილიტაციის პროექტების მომზადებასა და განხორციელებაში; 2007-2010წწ. "საქართველოს სახელმწიფო ელექტროსისტემაში" პროექტების აღმასრულებელი მენეჯერია; 2010 წელს დაინიშნა შპს "ენერგოტრანსის"ტექნიკურ დირექტორად, სადაც მისი მონაწილეობით განხორციელდა "შავი ზღვის გადაცემის სისტემის" პროექტი, რომლის მიხედვით აშენდა და 2013 წელს ექსპლუატაციაში შევიდა 500/400/220კვ. ქს ახალციხე, აღჭურვილი ულტრა თანამედროვე მოწყობილობებით, 2X350 მუდმივი დენის ჩანართით და 360მვა სიმძლავრის სინქრონული კომპენსატორებით; 2013 წლიდან მუშაობს ჯვარი-ხორგას 500/220კვ. ქსელისა და 500კვ. ეგხ ქსანი-სტეფანწმინდას საინვესტიციო პროექტებზე.

წყარო: საქართველოს ენერგეტიკოსები=Georgian Power Engineers: ენციკლოპედია.- თბილისი,. 2016.- გვ. 24-25